دينيلديگى گبى: هركس، هر شيئڭ حسنِ حقيقيسنى گورهمديگى ايچون، ظاهرى شرّيت و نقصانيت جهتنده خالقِ ذو الجلاله قارشى إعتراض ايتمهمك و رحمتنى إتهام ايتمهمك و حكمتنى تنقيد ايتمهمك و حقسز شكوا ايتمهمك ايچون، ظاهرى بر واسطهيى پرده ايدهرك، تا إعتراض و تنقيد و شكوا، او پردهلره گيدوب، خالقِ كريم و حكيمِ مطلقه توجّه ايتمهسين. ناصلكه وفات ايدن عبادڭ كوسمهسندن حضرتِ عزرائيلى قورتارمق ايچون خستهلقلرى أجله پرده ايتمش. اويله ده: حضرتِ عزرائيلى (عس) قبضِ أرواحه پرده ايدوب، تا مرحمتسز توهّم ايديلن او حالتلردن گلن شكوالر، جنابِ حقّه توجّه ايتمهسين. اويله ده: داها زياده بر قطعيتله شرلردن و فنالقلردن گلن إعتراض و تنقيد، خالقِ ذو الجلاله توجّه ايتمهمك ايچون، حكمتِ ربّانيه، شيطانڭ وجودينى إقتضا ايتمشدر.
رابعًا: إنسان كوچك بر عالم اولديغى گبى، عالم دخى بيوك بر إنساندر. بو كوچك إنسان، او بيوك إنسانڭ بر فهرستهسى و خلاصهسيدر. إنسانده بولونان نمونهلرڭ بيوك أصللرى، إنسانِ أكبرده بِالضروره بولونهجقدر. مثلا: ناصلكه إنسانده قوّۀِ حافظهنڭ وجودى، عالمده لوحِ محفوظڭ وجودينه قطعى دليلدر. اويله ده: إنسانده قلبڭ بر كوشهسنده لمّۀِ شيطانيه دينيلن بر آلَتِ وسوسه و قوّۀِ واهمهنڭ تلقيناتيله قونوشان بر شيطانى لسان و إفساد ايديلن قوّۀِ واهمه، كوچك بر شيطان حكمنه گچديگنى و صاحبلرينڭ إختيارينه ضد و آرزوسنه مخالف حركت ايتدكلرينى حسًّا و حدسًا هركس نفسنده گورمسى، عالمده بيوك شيطانلرڭ وجودينه قطعى بر دليلدر.
و بو لمّۀِ شيطانيه و شو قوّۀِ واهمه، بر قولاق و بر ديل اولدقلرندن، اوڭا اوفلهين و بونى قونوشديران خارجى بر شخصِ شريرهنڭ وجودينى إحساس ايدرلر.