مالى دگل؛ بلكه هركسڭ قلبنڭ بر كوشهسنده بولونان بر لمّۀِ رحمانيه و مَلكِ إلهام و بر طرفنده بر لمّۀِ شيطانى و وسوسهجى بولونديغنه أهلِ حقيقت و ديانتڭ حكملرينه بناءً؛ بنم قلبمده دخى هركس گبى بعضًا إختيارم خارجنده و فكريمڭ فوقنده خاطريمه بر حقيقت خطور ايدر، يعنى قرآندن و معنوى بر جانبدن بر نوع إلهام حكمنده بر گوزل نكته إفهام ايديلير ديمكدر.
و هيچ خاطريمه گلمييور كه، يڭى سعيد زماننده و نفسڭ شرّندن و بنلگندن چوق قورقان و بلاسنى چكن شخصمه بويله بر موقع ويرديگمى ويا ويرمك ايستديگمى تخطّر ايتمييورم. بلكه رسالۀِ النورده إثبات ايديلمش كه: بو زمان جماعت زمانيدر، شخصِ معنوى حكم ايدر. أسكى زمانده ضلالت بر شخصدن گلديگى جهتله، قارشيسنه بر داهئِ هدايت چيقاردى. شيمدى ايسه جماعت شكلنده بر شخصِ معنوى اولماسندن، اونڭ قارشيسنده آنجق بر شخصِ معنوى مقابله ايدهبيلير. يالڭز أسكيدن بَرى أهلِ حقيقت مابيْننده جارى و استادينه قارشى فرطِ محبّتدن گلن فوق الحدّ حسنِ ظنلرى تعديل ايتمك و نعمتِ إلٰهيهيه قارشى كفران و إنكار ايتمهمك نيّتيله، مجدّدلك وظيفهسى اولابيلير فقط بنم دگل رسالۀِ النورڭدر. بلكه بو زمانه باقان قرآنڭ بر جلوۀِ حقيقتيدر، رسالۀِ النور اونى تمثيل ايدر. بن نهجى اولويورم كه، كنديمه دعوا ايدهيم؟
دردنجى سهو: إسپارطهيه ياغمور ياغديرمسى، يازى بهاره چويرمهسى كرامتيدر، شاكردلرى طرفندن دينيلمش.
الجواب: ياغديرمق، چويرمك دگل بلكه رسالۀِ النور بركتيله ياغدى و دوندى دينيلمش.
سعيد النورسى
* * *