علمادن و فيلسوفلردن أهلِ وقوف بر هيئتِ علميهيى تشكيل ايدوب (غايت محرملر محدود بر ايكى رساله خارج اولارق) بتون رسالهلريمى تدقيق ايچون دڭزلى آغير جزا محكمهسى آنقره آغير جزا محكمهسنه سَوق ايتمشدر. بو مملكته مادّى و معنوى بركتى و فوق العاده خدمتى اوتوز اوچ آياتِ قرآنيهنڭ إشارتيله و إمامِ علىنڭ رضى اللّٰه عنه اوچ كراماتِ غيبيهسيله و غوثِ أعظمڭ (قس) قطعى إخباريله تحقّق ايتمش اولان رسالۀِ النوره عائد دعوا و إعتراض جزئى بر حادثه و شخصى بر مسئله دگل كه أهمّيت ويريلمهسين. بلكه بو ملّتى و مملكتى و حكومتى جدّى علاقهدار ايدهجك، طولاييسيله عالمِ إسلامڭ نظرِ دقّتنى أهمّيتلى بر صورتده جلب ايدهجك بر كلّى حادثه حكمنده عمومى بر مسئلهدر.
أوت رسالۀِ النوره پرده آلتنده هجوم ايدنلر أجنبى پارمغيله بو وطندهكى ملّتڭ أڭ بيوك قوّتى اولان عالمِ إسلامڭ توجّهنى و محبّتنى و اخوّتنى قيرمق و نفرت ويرديرمك ايچون سياستى دينسزلگه آلَت ايدهرك پرده آلتنده كفرِ مطلقى يرلشديرنلردر كه، حكومتى إغفال و عدليهيى ايكى دفعهدر شاشيرتوب و دير: «رسالۀِ النور و شاكردلرى دينى سياسته آلَت ايدر. أمنيته ضرر إحتمالى وار.» رسالۀِ النورڭ گرچه سياستله علاقهسى يوقدر. فقط كفرِ مطلقى قيرديغى ايچون كفرِ مطلقڭ آلتى اولان آنارشيلگى و اوستى اولان إستبدادِ مطلقى أساسيله بوزار، ردّ ايدر. أمنيتى، آسايشى، حرّيتى، عدالتى تأمين ايتديگنه يوزر حجّتلردن بو مدافعهنامهسى حكمندهكى ميوه رسالهسنى تقديم ايدييورم.
* * *