فلاكت داها... جنابِ حق بزه و رسالۀِ النوره تعرّض ايدنلرڭ قلبلرينه ايمان، باشلرينه حقيقتى گورهجك عقل إحسان ايتسين. بزى بو زندانلردن، اونلرى ده بو فلاكتلردن قورتارسين، آمين!
خسرو
* * *
﴿بِاسْمِهٖ سُبْحَانَهُ﴾
أوت بن ده خسروڭ زلزله حقّنده تفصيلاً يازديغى كرامتِ نوريهيى تصديق ايدرم و قناعتم ده او مركزدهدر. چونكه رسالۀِ النوره و شاكردلرينه درت دفعه شدّتلى تعرّضلرڭ عين زماننده درت دفعه دهشتلى زلزلهنڭ هجومى تام تامنه توافقلرى تصادفى اولماديغى گبى؛ رسالۀِ النورڭ ايكى مركزِ إنتشارى اولان إسپارطه و قسطمونينڭ سائر يرلره نسبةً آفاتدن محفوظ قالمالرى و سورۀِ وَالْعَصْرِ إشارتيله، آخر زمانڭ أڭ بيوك بر خسارتِ إنسانيهسى اولان بو حربِ عموميدن چارۀِ نجات ايسه ايمان و عملِ صالح اولماسندن، رسالۀِ النورڭ آناطولينڭ هر طرفنده ايمانِ تحقيقىيى نشرى زماننه آناطولينڭ فوق العاده اولارق بو خسارتِ عظيمۀِ حربيهدن قورتولماسى زماننه تام تامنه توافقى دخى تصادفى اولاماز. هم رسالۀِ النورڭ خدمتنه ضرر ويرن ويا خدمتده قصور ايدنلره عين زماننده گلن شفقت ويا حدّت طوقاتلرينڭ يوزر وقوعاتلرى تام تامنه توافقلرى تصادفى اولماديغى گبى، رسالۀِ النوره حسنِ خدمت ايدنلرڭ همان همان بِلا إستثنا معيشتده وسعت و بركت و قلبنده مسرّت و راحت گورمهلرينڭ بيڭلر حادثهلرى دخى تصادفى اولماز.
سعيد النورسى
* * *