نظرلرنده قرآنڭ هيچ بر شيئه آلَت اولاميان قدسى حقيقتلرى بر پروپاغندۀِ سياستده آلَت اولمش توهّم ايديلهجك. هم ملّتڭ هر طبقهسى؛ موافقى مخالفى، مأمورى عاميسى او حقيقتلرده حصّهلرى وار و اونلره محتاجدرلر. رسالۀِ النور شاكردلرى، تام بىطرف قالمق ايچون سياستى و مادّى مبارزهيى تام بيراقمق و هيچ قاريشمهمق لازم گلمش.
آلتنجى أساس: بو مسئلهده بنم شخصمڭ ويا بعض قارداشلريمڭ قصوريله رسالۀِ نوره هجوم ايديلمز. او طوغريدن طوغرىيه قرآنه باغلانمش و قرآن دخى عرشِ أعظم ايله باغليدر. كيمڭ حدّى وار، ألنى اورايه اوزاتسين، او قوّتلى ايپلرى چوزسون. هم بو مملكته مادّى و معنوى بركتى و فوق العاده خدمتى، اوتوز اوچ آياتِ قرآنيهنڭ إشاراتى ايله و إمامِ على رضى اللّٰه عنهڭ اوچ كراماتِ غيبيهسيله و غوثِ أعظمڭ (قدّس سرّه) قطعى إخباريله تحقّق ايتمش اولان رسالۀِ النور؛ بزم عادى و شخصى قصوريمزدن مسئول اولماز و اولاماز و اولماملى. يوقسه بو مملكته هم مادّى، هم معنوى تلافى ايديلميهجك درجهده ضرر اولاجق. (حاشيه)
بعض زنديقلرڭ شيطنتيله رسالۀِ النوره قارشى چوريلن پلانلر و هجوملر إن شاء اللّٰه بوزولاجقلر، اونڭ شاكردلرى باشقهلره قياس ايديلمز، طاغيتديريلماز، واز گچيريلمز، جنابِ حقّڭ عنايتيله مغلوب ايديلمزلر. أگر مادّى مدافعهدن قرآن منع ايتمسه ايدى، بو ملّتڭ جان طمارى حكمنده عمومڭ توجّهنى قزانان و هر طرفده بولونان او شاكردلر، شيخ سعيد و منمن حادثهلرى گبى جزئى و نتيجهسز حادثهلرله بولاشمازلر. اللّٰه ايتمهسين، أگر مجبوريتِ قطعيه درجهسنده اونلره ظلم ايديلسه و
___
(حاشيه): بو إستدعا قسطمونى زلزلهسندن يگرمى گون أوّل يازيلمشدى. رسالۀِ النور بركتيله هر ولايتدن زياده آفاتدن محفوظ قالمشدى. شيمدى آفات باشلادى، بو دعوامزى تصديق ايتدى.