ايدييور. الحمد لِلّٰهِ ديدم، بنم مدافعهمه إحتياج بيراقمييور. صوڭره خاطريمه گلدى كه: «نتيجه نه اولاجق؟» دييه مراق ايتدم. گوردم:
(اَللّٰهُ حَفٖيظٌ عَلَيْهِمْ ۞ طُوبٰى لَهُمْ) دهكى ايكى جمله، تنوين صاييلمق شرطيله، مقامِ جفريسى عينًا بيڭ اوچيوز آلتمش ايكى (أگر بر مدّه صاييلماسه) و بيڭ اوچيوز آلتمش اوچ ايدر (أگر او مدّه دخى صاييلسه) تام تامنه حفظِ إلٰهىيه پك چوق محتاج اولديغمز بو زمانه و بو سنهنڭ و گلهجك سنهنڭ هجرى عين تاريخنه توافق ايدهرك، بر سنهدن بَرى بيوك بر دائرهده و گنيش بر ساحهده عليهمزه إحضار ايديلن دهشتلى بر هجوم قارشيسنده محفوظيتمزه تأمينات ايله تسلّى ويرييور. رسالۀِ النورڭ بو حادثهده داها پارلاق فتوحاتى مأمورين دائرهلرنده بولونماسندن شيمديكى موقّت توقّف بزى مأيوس ايتمز و ايتمهملى. و آيت الكبرانڭ طبعى سببيله مصادرهسى، اونڭ پارلاق مقامنه و نظرِ دقّتى هر طرفدن اوڭا جلب ايتمهسنه بر إعلاننامه تلقّى ايدييورم.
(مَنْ اٰمَنَ بِالْقَدَرِ اَمِنَ مِنَ الْكَدَرِ) أڭ گوزل بر دستورِ تسلّيدر. بو تسليميتله برابر، غايت قوّتلى بر تسانده و بربرينڭ قصورينه باقمامغه و رسالۀِ النوره قارشى علاقهيى گَوْشتمك دگل، بلكه داها زياده قوّتلشديرمگه شدّتله إحتياجمز وار. بن گورويورم، بزه هجوم ايدنلر أڭ زياده تسانديمزى بوزمق ايستهيورلر و أڭ زياده بڭا قارشى إهانت درجهسنده حرمتى قيرمغه چاليشييورلر. گويا رسالۀِ النوره قارشى حرمت، بندن ايلرى گلييور. بنى قيرمقله او قيريلير دييه ديوانهلكلرندن ظن ايدييورلر. هم شدّتلى بر صورتده قونوشمقدن بنى منع ايدييورلر. تا كه حقيقتِ مسئله آڭلاشيلمهسين و رسالۀِ النور صوصسون. او بدبختلر بيلمييورلر كه؛ بنم ضعيف ديلمڭ صوصماسيله، أطرافده بيڭلر قارداشلريمڭ قوّتلى ديللرى و رسالۀِ النورڭ مملكتده إنتشار ايدن بيڭلر نسخهلرينڭ پارلاق لسانلرى قونوشويورلر و صوصمازلر و صوصديريلمازلر.