بردن خاطره گلدى كه، إمامِ على رضى اللّٰه عنه: «يا ربّ! امان وير!» دييه دعا ايتمش؛ إن شاء اللّٰه، او دعانڭ سرّيله سلامته چيقارسڭز.
أوت حضرتِ على رضى اللّٰه عنه، قصيدۀِ جلجلوتيهده ايكى صورتله رسالۀِ النوردن خبر ويرديگى گبى، آيت الكبرى رسالهسنه إشارةً (وَبِالْاٰيَةِ الْكُبْرٰى اَمِنّٖى مِنَ الْفَجَتْ) دير. و بو إشارتده ايما ايدر كه: آيت الكبرى يوزندن أهمّيتلى بر مصيبت رسالۀِ النور طلبهلرينه گلهجك و آيت الكبرى حقّى ايچون او فَجَتْ و مصيبتدن شاكردلرينه امان وير، دييه نياز ايدر، او رسالهيى و منبعنى شفاعتجى ياپار. أوت آيت الكبرى رسالهسنڭ طبعى بهانهسيله گلن مصيبت، عينًا او رمزِ غيبىيى تصديق ايتدى.
هم او قصيدهده رسالۀِ النورڭ مهمّ أجزالرينه ترتيبيله إشارتلرڭ خاتمهسنده، مقابل صحيفهده دير:
﴿فَتِلْكَ حُرُوفُ النُّورِ فَاجْمَعْ خَوَاصَّهَا § وَحَقِّقْ مَعَانٖيهَا بِهَا الْخَيْرُ تُمِّمَتْ﴾
يعنى: «ايشته رسالۀِ النورڭ سوزلرى حرفلرى كه، اونلره إشارتلر أيلهدك. سن اونلرڭ خاصّهلرينى طوپلا و معنالرينى تحقيق أيله. بتون خير و سعادت، اونلر ايله تمام اولور.» دير. «حرفلرڭ معنالرينى تحقيق ايت.» قرينهسيله معنايى إفاده ايتمهين هجائى حرفلر مراد اولماديغنه، بلكه كلمهلر معناسندهكى «سوزلر» ناميله رسالهلر مراددر.
﴿رَبَّنَا لَا تُؤَاخِذْنَٓا اِنْ نَسٖينَٓا اَوْ اَخْطَاْنَا﴾
﴿لَا يَعْلَمُ الْغَيْبَ اِلَّا اللّٰهُ﴾
* * *