بن روسيهدهكى أسارتمده بو موقعه ياقين بولونويوردم. ديمك بيوك دجّال، شمالدن بو طرفه تجاوز ايدهجگنى معجزانه بر إخباردر.
ايكنجى تأويلى ايسه: هم بيوك دجّالڭ، هم إسلام دجّالنڭ اوچ دورۀِ إستبدادلرى معناسنده اوچ أيّام وار. «بر گونى؛ بر دورۀِ حكومتنده اويله بيوك إجراآت ياپار كه، اوچ يوز سنه ياپيلماز. ايكنجى گونى، يعنى ايكنجى دورهسى، بر سنهده اوتوز سنهده ياپيلميان ايشلرى ياپديرر. اوچنجى گونى و دورهسى، بر سنهده ياپديغى تبديللر اون سنهده ياپيلماز. دردنجى گونى و دورهسى عاديلشير، بر شى ياپماز، يالڭز وضعيتى محافظهيه چاليشير.» دييه، غايت يوكسك بر بلاغتله امّتنه خبر ويرمش.
اون اوچنجى مسئله:
قطعى و صحيح روايتده وار كه: «عيسى عليه السلام بيوك دجّالى ئولديرر.»
﴿وَالْعِلْمُ عِنْدَ اللّٰهِ﴾
بونڭ ده ايكى وجهى وار:
بر وجهى شودر كه: سحر و مانيهتيزمه و إسپرتيزمه گبى إستدراجى خارقهلريله كندينى محافظه ايدن و هركسى تسخير ايدن او دهشتلى دجّالى ئولديرهبيلهجك، مسلگنى دگيشديرهجك؛ آنجق خارقه و معجزاتلى و عمومڭ مقبولى بر ذات اولابيلير كه: او ذات، أڭ زياده علاقهدار و أكثر إنسانلرڭ پيغمبرى اولان حضرتِ عيسى عليه السلامدر.
ايكنجى وجهى شودر كه: شخصِ عيسى عليه السلامڭ قلنجى ايله مقتول اولان شخصِ دجّالڭ تشكيل ايتديگى دهشتلى مادّيونلق و دينسزلگڭ عظمتلى هيكلى و شخصِ معنويسنى ئولديرهجك و إنكارِ الوهيت اولان فكرِ كفريسنى محو ايدهجك آنجق عيسوى روحانيلريدر كه؛ او روحانيلر، دينِ عيسوينڭ حقيقتنى