برنجى كرامتِ علويه
جاىِ دقّت
شو عجيب لمعهنڭ أهمّيتى اوچ نقطهدن گلييور:
برنجيسى و أڭ مهمّى: گيزلى قالمش، غيبى، مهمّ بر معجزۀِ أحمديهيى (عصم) (حاشيه) بيان ايدر كه؛ جوامع الكلم نوعندن ايكى جملهدن عبارت بر حديثِ شريف ايكى صحيفه قدر حقائقِ تاريخيهيى و ايكى دولتِ عظيمۀِ إسلاميهنڭ خاتمهلرينى إفاده ايدييور.
ايكنجيسى: كراماتِ أولياء حق اولديغنه قطعى بر برهان گوسترن حضرتِ على رضى اللّٰه عنهڭ لاتين حروفنڭ قبولنى تام تاريخيله و طرزِ تطبيقنى ايكى كلمه ايله گوسترمسيدر.
اوچنجيسى: رسالۀِ نور شاكردلرينه و ناشرلرينه قارشى حضرتِ على رضى اللّٰه عنهڭ إرشادكارانه و توجّهكارانه باقماسى و إشارت ايتمهسيدر.
___
(حاشيه): معجزاتِ أحمديهيه (عصم) دائر اولان اون طوقوزنجى مكتوبڭ جزءِ أوّلنده ذكر ايديلن حدسز إخباراتِ غيبيۀِ أحمديه (عصم) نوعندن سكسان معجزۀِ غيبيۀِ أحمديه (عصم) بونڭله سكسان بر اولور.