إسمِ أعظم ايله مشغول اولانلر ايله قونوشور، تسلّى و تشجيع ايدر. هم مادام او قصيدهلر إستقباله باقدقلرى وقت؛ چوق أمارهلر و إشارتلر ايله، هم معنالر ايله، هم جفرى حسابيله شو زمانمزى و شو زماندهكى حادثاتِ عجيبهيه پارمق باصييور و عين حادثهيى مكرّرًا إشارتله گوسترييور. هم مادام رسالۀِ نور بو زمانده ايمان و قرآن خدمتنده حضرتِ علىنڭ (رض) نظرينه چارپهجق أڭ أهمّيتلى بر حادثهدر. و حضرتِ على (رض) تأسيسنده خارقه علميله و خارق العاده شجاعتيله جهانپسندانه خدمت ايتديگى و اوستنده تيترهديگى حقائقِ ايمانيه و قرآنيهيى خارقه بر طرزده قطعى برهانلريله إثبات ايدن رسالۀِ نور او قدسى حقيقتلرى گونش گبى گوسترمشدر. هم مادام حضرتِ علىنڭ (رض) قدسى استادندن (عصم) آلديغى و بو أمّته ويرديگى أڭ مهمّ درس، بو ايكى قصيدۀِ غيبيهسنڭ موضوع و أساسى و روحى اولان سكينهيى و إسمِ أعظمى بو زمانده هركسدن زياده كندينه ورد ايدن و اون اوچ سنهدن بَرى إسمِ أعظمله برابر بيڭ بر أسماءِ إلٰهيه ايچنده بولونان جوشن الكبيرى ايله و او أسماء ايله علومِ قرآنيهنڭ خزينهسنى آچان يوز يگرمى رسالهيى او أسمانڭ فيضى ايله قرآنه تفسير ياپان و يگرمى درت ساعتده يوز يتمش بر دفعه سكينه و إسمِ أعظم دينيلن أسماءِ ستّۀِ مشهورهيى بيڭ اوچيوز مكرّر آياتله اوقويان و آلِ بيتڭ معنوى غايت مهمّ بر ميراثى و بر معدنِ فيضى اولان جوشن الكبيرى كندينه استاد ايدن و بدايتده هر گونده بر دفعه، بعضًا ايكى اوچ دفعه تمامنى اوقويان و طلبهلرينه توصيه ايدن آدم، رسالۀِ نور مؤلّفيدر. هم مادام ايكى قصيدهنڭ صراحته ياقين آلتى يرنده اوندن خبر ويرييور. حتّى يالڭز (فَيَا حَامِلَ الْاِسْمِ الَّذٖى جَلَّ قَدْرُهُ) مقامنده دخى آلتى سطرده آلتى دفعه (لَاتَخْشَ) ايله بو زمانڭ أڭ مدهش حادثهسى اولان برنجى حربِ عمومىيى