جلجلوتيهسنده إستقباله باقان آلتى سطرده آلتى دفعه مكرّرًا عين تاريخه و عين قورقولى وقتنه (لَا تَخْشَ) كلمهسنده جفر حسابيله و معناسيله گوسترمسى شكسز، شبههسز بر كرامتِ غيبيهسيدر. رسولِ أكرم عليه الصلاة والسلامدن درس آلمش، أمّته درس ويرمش. أوت (لَا تَخْشَ) جفر أبجد حسابيله بيڭ اوچيوز اوتوز بر (١٣٣١) ايدر. چونكه (لَا تَخْشَ) دهكى (خ) آلتى يوز، (ت) درت يوز، (ش) اوچيوز، (لا) اوتوز بر ايدر. مجموعى بيڭ اوچيوز اوتوز بر (١٣٣١) ايدر.
(لَا تَخْشَ مِنْ سَيْفٍ وَلَا طَعْنِ خَنْچَرٍ) فقرهسندهكى (مِنْ سَيْفٍ وَلَا طَعْنِ خَنْچَرٍ) جملهسى (سَيْفٍ) آخرندهكى تنوين نون صاييلمق شرطيله بيڭ اوچيوز طوقوز (١٣٠٩) ايدر. ايشته او تاريخ ايسه (لَا تَخْشَ) خطابنه مظهر اولان رسالۀِ نور مؤلّفنڭ عادتِ محلّيه و سلاحِ ملّى اولان سيف و خنچرڭ هجومنه هدف قالديغى، سيف و خنچرى برابرنده طاشيمغه مجبور اولديغى و قيصقانجلق سببيله سعردده عالملر و طلبهلرڭ بيوك بر منازعه و غاوغالرينه معروض بولونديغى هنگامه تام تامنه توافق ايدر. بو توافق ايسه سائر فقرهلرڭ إتّفاقيله قوّتلنييور، ايمادن إشارت بلكه دلالت درجهسنه چيقييور.
(وَ لَا تَخْشَ مِنْ رُمْحٍ وَلَا شَرٌّ اَسْهَمَتْ) فقرهسندهكى (وَلَا شَرٌّ اَسْهَمَتْ) جملهسنده شدّهلى «ر» ايكى «ر» و اوستندهكى تنوين «نون» صاييلمق شرطيله بيڭ ايكى يوز طقسان اوچ (١٢٩٣) ايدر. ايشته بو تاريخ روسڭ عالمِ إسلامڭ فلاكتنه سبب اولان طقسان اوچ دهشتلى حربڭ زماننه و رسالۀِ نور مؤلّفنڭ تاريخِ ولادتنه تام تامنه توافقى، شبههسز قصدى بر إشارتِ غيبيهدر. أگر شدّهلى «ر» بر