متعدّد طرزده (اَلْاِسْمُ الْمُعَظَّمُ قَدْرُهُ الَّذٖى جَلَّ قَدْرُهُ) گبى تعبيرلرله بيان ايتديگى أسماءِ ستّۀِ مشهوره كه؛ إسمِ أعظمدر. گوسترديگى بيڭ اوچيوز أللى اوچ (١٣٥٣) تاريخنده (حاشيه-١) يوز يتمش بر دفعه أسماءِ ستّهسى رسالۀِ نور مؤلّفنڭ دائمى ورديدر. و او يوز يتمش بر دفعه اوقوديغم أسماءِ ستّه ايله برابر يتمش بر آيتى يگرمى درت ساعتده اون طوقوز دفعه اوقويهرق يكونى بيڭ اوچيوز أللى اوچ (١٣٥٣)، هم بر جهتده بيڭ اوچيوز قرق بر (١٣٤١) ايدر كه؛ بو إسمِ أعظمه بيڭ اوچيوز قرقدن (١٣٤٠) بَرى دوام ايتديگمڭ تاريخنه توافق ايدييور. هم بر دفعهسنده اون طوقوز آيت إسمِ أعظمله برابر اون طوقوز دفعه دائمى اوقونور. و آيتلرڭ تكراراتنڭ حروفاتنڭ عددى آلتى بيڭ آلتى يوز آلتمش آلتى (٦٦٦٦) آياتِ قرآنيهيه توافق ايدييور. سورۀِ إخلاصڭ اوچ و فاتحۀِ شريفهنڭ تكرّرِ نزولى ايچون ايكى اولسه ينه تام تامنه توافق ايدييور.
___
(حاشيه): بلكه (فَيَا) ندا ايله چاغيرديغى (حَامِلَ الْاِسْمِ الَّذٖى جَلَّ قَدْرُهُ) حسابِ أبجد و جفرله بيڭ اوچيوز أللى درت (١٣٥٤) ايدر كه؛ بو عربى تاريخده رسالۀِ نورڭ قرقدن فضله شاكردلرينى و مؤلّفنى إمحا ايتمك پلانى ايله حپسخانهيه آتدقلرى زماندر و توقيف ايتدكلرى تاريخدر. بو تاريخده بو خطابه تام مخاطب اولارق، يالڭز بونلر گورونويورلر. چونكه وضعيتلرى غايت قورقولى ايدى. حالبوكه خارقه اولارق سلامته چيقديلر. بو فقرهده حضرتِ على (رض) دييور: (تَوَقّٰى بِهٖ كُلَّ الْاُمُورِ تَسَلَّمَتْ) يعنى إسمِ أعظمڭ بركتيله هر بر تهلكهدن سلامتله قورتولاجقسڭز. أوت، شكر قورتولدق. أگر (اَلَّذٖى جَلَّ) دهكى ايكى شدّهلى لاملر برر لام صاييلسه بيڭ ايكى يوز طقسان درت (١٢٩٤) ايدر كه؛ او زمان، رسالۀِ نور مؤلّفنڭ دنيايه گلديگى تاريخدر و طقسان اوچ مدهش حربندن تا حربِ عمومىيه قدر و بيڭ اوچيوز أللى درده (١٣٥٤) قدر اولان تهلكهلى بر زمانده ياشايهجقسڭ و چوق تهلكهلره دوشهجكسڭ، فقط قورقمه قورتولاجقسڭ دييه إشارت ايدييور.