رسالۀِ نورڭ فعّال بر شاكردى اولان أحمد نظيفڭ بر فقرهسيدر.
بونى هم برنجى شعاعڭ اوتوز ايكنجى آيتى اولارق، هم يگرمى يدنجى مكتوبڭ فقرهلرنده قيد ايتمك مناسب گورولدى.
او كنديسى دييور: گلن آيتلرى حافظدن ديڭلهدم. سورۀِ أحزابدن:
﴿يَٓا اَيُّهَا الَّذٖينَ اٰمَنُوا اذْكُرُوا اللّٰهَ ذِكْرًا كَثٖيرًا ۞ وَسَبِّحُوهُ بُكْرَةً وَاَصٖيلًا ۞ هُوَ الَّذٖى يُصَلّٖى عَلَيْكُمْ وَمَلٰٓئِكَتُهُ لِيُخْرِجَكُمْ مِنَ الظُّلُمَاتِ اِلَى النُّورِ وَكَانَ بِالْمُؤْمِنٖينَ رَحٖيمًا ۞ تَحِيَّتُهُمْ يَوْمَ يَلْقَوْنَهُ سَلَامٌ وَاَعَدَّ لَهُمْ اَجْرًا كَرٖيمًا ۞ يَٓا اَيُّهَا النَّبِىُّ اِنَّٓا اَرْسَلْنَاكَ شَاهِدًا وَمُبَشِّرًا وَنَذٖيرًا ۞ وَدَاعِيًا اِلَى اللّٰهِ بِاِذْنِهٖ وَسِرَاجًا مُنٖيرًا ۞ وَبَشِّرِ الْمُؤْمِنٖينَ بِاَنَّ لَهُمْ مِنَ اللّٰهِ فَضْلًا كَبٖيرًا﴾
بو آيتلرده رسالۀِ نوره ايما و رمز و بلكه إشارتلر وار، دييه حسّ ايتدم. أوت مادام بو آيت گبى وظيفۀِ رسالت و دعوته باقان آيتلر هر عصره باقييورلر، هر عصرده أفرادلرى و ماصدقلرى وار. و مادام بو آيتلرده رسولِ أكرم عليه الصلاة والسلامه ويريلن صفتلر و عنوانلر هر زمانده جريان و هر بر عصرده حكم ايتمك حيثيتيله، او عنوانلرڭ آلتنده معناىِ رمزى ايله رسالۀِ نور گبى او وظيفهيى يرينه گتيرن أثرلر و ذاتلر بو گبى آياتڭ دائرۀِ شموللرينه گيرمهلرينه، قرآندهكى إعجازِ معنويسنڭ شأنيدر بلكه مقتضاسيدر و لازميدر. و مادام رسالۀِ النور، بو عجيب عصرده مستثنا بر صورتده بو آيتڭ إشارت ايتديگى وظيفهيى ياپييور و معناسنڭ دائرۀِ كلّيهسنده بر فرديدر.