اوتوز برنجى آيت
پدريله برابر رسالۀِ نور طلبهلرندن صلاح الدين چلبينڭ رسالۀِ نوره عائد بر آيتدن بر إستخراجيدر.
﴿وَاِنْ كُنْتُمْ مَرْضٰى اَوْ عَلٰى سَفَرٍ اَوْجَٓاءَ اَحَدٌ مِنْكُمْ مِنَ الْغَٓائِطِ اَوْ لٰمَسْتُمُ النِّسَٓاءَ فَلَمْ تَجِدُوا مَٓاءً فَتَيَمَّمُوا صَعٖيدًا طَيِّبًا﴾
معناىِ ظاهريسيله دييور كه: صو بولامديغڭز وقت تميز طوپراق ايله تيمّم ايديڭز دير. و معناىِ إشاريسيله دييور كه: بيڭ اوچيوز أللى يدى (١٣٥٧) ده معنوى آبِ حيات منبعلرى قپاتيلديغى زمانده، تميز طوپراغه قصد و توجّه ايديڭز. اونده بر منبعِ حيات و بر معدنِ نور بولورسڭز.
بو آيتڭ إشارتى خصوصى بر صورتده رسالۀِ نوره باقماسنه ايكى أماره وار:
برنجيسى: بو (فَلَمْ تَجِدُوا مَٓاءً فَتَيَمَّمُوا صَعٖيدًا) آيتڭ مقامِ أبجدى و جفريسى بيڭ اوچيوز أللى يدى (١٣٥٧) ايدر. او تاريخلرده مدرسه و إرشادگاهلرڭ سدّيله و أهلِ علم صاريقلرينڭ آچيلماسيله و معنوى صوسزلق باشلاديغى هنگامده، رسالۀِ نور حقائقِ ايمانيه جهتنده اون بش سنهده قزانيلان ايمانِ تحقيقىيى اون بش هفتهده، بلكه اون بش گونده، بلكه تام مستعدلره اون بش ساعتده صارصيلميهجق درجهده ايمانِ تحقيقىيى قزانديرماسى، قوى بر أمارهدر كه، شو إشارت اوڭا خصوصى باقار.