برنجى دائره: روىِ زمينده مؤمنلر و موحّديندهكى جماعتِ عظما.
ايكنجى دائره: باقدم، عموم موجودات، بر صلاتِ كبراده، بر تسبيحاتِ عظماده، هر طائفه كندينه مخصوص صلوات و تسبيحاتى ايله مشغول بر جماعت ايچندهيم. «وظائفِ أشيا» تعبير ايديلن خدماتِ مشهوده، اونلرڭ عبوديتلرينڭ عنوانلريدر. او حالده «اللّٰه أكبر» دييوب حيرتدن باشمى أگدم، نفسمه باقدم:
اوچنجى بر دائره ايچنده، حيرتأنگيز ظاهرًا و كيفيةً كوچك، حقيقةً و وظيفةً و كميةً بيوك، بر كوچك عالمى گوردم كه ذرّاتِ وجوديهمدن تا حواسِّ ظاهريهمه قدر، طائفه طائفه وظيفۀِ عبوديتله و شكرانيه ايله مشغول بر جماعت گوردم. بو دائرهده، قلبمدهكى لطيفۀِ ربّانيهم، (اِيَّاكَ نَعْبُدُ وَاِيَّاكَ نَسْتَعٖينُ) او جماعت نامنه دييور. ناصل، أوّلكى ايكى جماعتده ده لسانم، او ايكى جماعتِ عظمايى نيّت ايدهرك ديمشدى.
الحاصل: (نَعْبُدُ) نونى، شو اوچ جماعته إشارت ايدييور.
ايشته بو حالتده ايكن بردن قرآنِ حكيمڭ ترجمانى و مبلّغى اولان رسولِ أكرم عليه الصلاة والسلامڭ، (مدينۀِ منوّره دينيلن معنوى منبرنده) شخصيتِ معنويهسى، حشمتيله تمثّل ايدهرك، (يَٓا اَيُّهَا النَّاسُ اعْبُدُوا رَبَّكُمْ) خطابنى، معنًا هركس گبى بن ده ايشيدوب؛ او اوچ جماعتده هركس بنم گبى (اِيَّاكَ نَعْبُدُ) ايله مقابله ايدييور تخيّل ايتدم. (اِذَا ثَبَتَ الشَّىْءُ ثَبَتَ بِلَوَازِمِهٖ) قاعدهسنجه، شويله بر حقيقت فكره گوروندى كه:
مادام بتون عالملرڭ ربّى، إنسانلرى مخاطب إتّخاذ ايدوب، عموم موجوداتله قونوشور و شو رسولِ أكرم عليه الصلاة والسلام، او خطابِ عزّتى، نوعِ بشره بلكه