ايديجى اولديغنى بيلديرمشدر. سينوبده عين گونده چوق قورقونج بر فورطنه اولمش، گوك گورولتيلرى و شمشكلرله گيتدكجه شدّتنى آرتيرمشدر.
داها صوڭره باشقه بر غزتهده، تماملاييجى و حيرت ويريجى شو معلوماتلرى گوردم: زلزلهدن أوّل كديلر، كوپكلر اوچر بشر اولارق طوپلانمشلر، دوشونجهلى، حزنلى گبى آليق آليق بربرينه باقهرق بر مدّت برابر اوطورمشلر، صوڭره طاغيلمشلر. گرك زلزله اولوركن و گركسه اولمادن أوّل ويا اولدقدن صوڭره ده بو حيوانلردن هيچ برى گورولمهمش؛ قصبهلردن اوزاقلاشهرق قيرلره گيتمشلر. بر غريبى ده شو كه: بو حيوانلر عصيانمزدن متولّد اولارق باشمزه گلهجك فلاكتلرى لسانِ حاللريله خبر ويردكلرينى يازييورلر ده بز آڭلامييورز دييهرك تعجّب ايدييورلر.
ايشته استاديمز بديع الزمان اوزون سنهلردن بَرى «زنديقلر رسالۀِ نوره طوقونماسينلر و شاكردلرينه ايليشمهسينلر. أگر طوقونورلر و ايليشيرلرسه ياقيندن بكلهين فلاكتلر، اونلرى يوز دفعه پشيمان ايدهجك.» دييه رسالۀِ النور ايله خبر ويرديگى يوزلر حادثات ايچنده ايشته زلزله أليله طوغريلغنى إمضا ايدهرك گلن درت حقيقتلى فلاكت داها... جنابِ حق بزه و رسالۀِ النوره تعرّض ايدنلرڭ قلبلرينه ايمان و باشلرينه حقيقتى گورهجك عقل إحسان ايتسين. بزى بو زندانلردن، اونلرى ده بو فلاكتلردن قورتارسين، آمين!
موقوف
خسرو
* * *