بو ايكى گون ظرفنده بو كوچك نمونهلر گبى، استاديمز معجزاتِ أحمديهنڭ (عصم) تصحيحاتيله مشغول اولديغى ايچون، چوق نمونهلر گورمش. مادام ايكى گون ظرفنده بو قدر عناياتڭ جلوهلرينى گورويورز. رسالۀِ نور دائرهسى ايچنده دقّت ايديلسه هركس (كندى نفسنده) خدمتى درجهسنده بويله نمونهلرى گورهجكدر.
رسالۀِ نور شاكردلرندن
حلمى، أمين، كامل، فيضى، حافظ أحمد
أوت، بن ده تصديق ايدييورم.
سعيد النورسى
* * *
فيضيله أمين دييورلر: استاديمز اولان رسالۀِ نورڭ جدّى حقائقلرى ايچنده أڭ طاتلى بر فاكههسى توافق اولديغى ايچون، قارداشلريمزه ينه بو ايكى گون ظرفنده كوچك بر ايكى توافقى، سزه بوندن أوّلكى توافقه حاشيه اولارق يازييورز:
أوت ناصلكه كلماتده و كلماتِ مكتوبهده توافق؛ بر قصد، بر عنايتِ خصوصيهيى گوسترييور. بعضًا خارقه اولوب كرامت درجهسنه چيقييور. بعضًا لطيف بر ظرافت ويرييور. عينًا اويله ده، رسالۀِ نوره عائد و استاديمزه عائد حادثاتده ده عينًا قصدى و عنايتكارانه توافقى، أقوالده اولديغى گبى، او أفعالده ده گورويورز. أزجمله:
سزه يازيلان، درت آى گلمهين خانه صاحبهسى ايچون أمين قارداشمزه ديدى: «خبر گوندر» تكلّمنده، اونڭ قپو چالماسى توافق ايتديگى گبى؛ عين جملهيى بر گون صوڭره ايكى دفعه اوقوديغى زمان، «أمينه ديديگى» كلمهسى اوقونديغى آننده، آشاغيدهكى قپويى أمين آچدى. گلمك زمانى گلمهدن گلدى. ايكنجى گون، ينه باشقه بر آدمه اوقونديغى وقت، «أمينه ديديگى» كلمهسنى