(بر مكتوبڭ پارچهسيدر. بو مقام مناسبتنه بناءً يازيلدى.)
عزيز، صدّيق قارداشلرم!
صاقين، دنيا جريانلرى، خصوصًا سياست جريانلرى و بِالخاصّه خارجه باقان جريانلر سزى تفرقهيه آتماسين. قارشيڭزده إتّحاد ايتمش ضلالت فرقهلرينه قارشى سزى پريشان ايتمهسين (اَلْحُبُّ فِى اللهِ وَالْبُغْضُ فِى اللهِ) دستورِ رحمانى يرينه، اَلْعِيَاذُ بِاللّٰه (اَلْحُبُّ فِى السِّيَاسَةِ وَالْبُغْضُ لِلسِّيَاسَةِ) دستورِ شيطانى حكم ايدهرك، مَلك گبى بر حقيقت قارداشنه عداوت و الخنّاس گبى بر سياست آرقداشنه محبّت و طرفدارلقله ظلمنه رضا گوستروب، جنايتنه معنًا شريك أيلهمسين.
أوت بو زماندهكى سياست، قلبلرى إفساد ايدوب عصبى روحلرى عذاب ايچنده بيراقير. سلامتِ قلب و إستراحتِ روح ايستهين آدم، سياستى بيراقمالى. أوت، شيمدى كُرۀِ أرضده هركس يا قلبًا، يا روحًا، يا عقلاً، يا بدنًا گلن مصيبتدن حصّهدارلقدن عذاب چكييور، پريشاندر. بِالخاصّه أهلِ ضلالت و أهلِ غفلت، مرحمتِ عموميۀِ إلٰهيهدن و حكمتِ تامّۀِ سبحانيهدن خبرسز اولديغندن، نوعِ بشره رقّتِ جنسيه، علاقهدارلق جهتيله كندى ألمندن باشقه نوعِ بشرڭ شيمديكى أليم و دهشتلى ألملريله دخى متألّم اولوب عذاب چكييور. چونكه لزومسز و مالايعنى بر صورتده وظيفۀِ حقيقيهلرينى و ألزم ايشلرينى بيراقوب آفاقى و سياسى بوغوشمالره و كائناتڭ حادثهلرينى مراقله ديڭلهيهرك، قاريشهرق روحلرينى سرسم عقللرينى گوهزه ايتمشلر. ضرره راضى اولانه مرحمت ايديلمز معناسنده (اَلرَّاضٖى بِالضَّرَرِ لَا يُنْظَرُ لَهُ) قاعدۀِ أساسيهسيله شفقت حقّنى و مرحمت لياقتنى كنديلرندن سلب ايتمشلر. اونلره آجينميهجق و شفقت ايديلمز. و لزومسز باشلرينه بلا گتيرييورلر.