رسالۀِ نورڭ منسوبلرى، شعور و إختيارلرى خارجنده بربريله مناسبتدار، بربرينڭ حادثهلريله علاقهدار اولديغنه بر دليل ده بوگونلرده اولدى. شويله كه:
اورادهكى حادثهنڭ وقوعندن بوگونه قدر، بورادهكى مختلف طبقهلردهكى طلبهلرڭ وضعيتلرى، أهمّيتلى بر حادثه يوزندن دگيشمش گبى چكينمك و منافقلرڭ نظرينى كنديلرينه و بزلره جلب ايتمهمك ايچون توقّف دورهسى گچدى. هم نظيف گبى بر چوق ذاتڭ رؤيالرينڭ تعبيرلريله، سزڭ حادثهڭز اولديغنى آڭلادق.
عموم قارداشلريمزه برر برر خصوصًا مصيبتزدهلره سلام و دعا ايدييورز. جنابِ حق اونلرى چابوق قورتاروب (حاشيه) وظيفهلرينڭ باشلرينه گچيرسين، آمين.
قارداشڭز
سعيد النورسى
* * *
رسالۀِ نورڭ مهمّ بر ركنى اولان حافظ علىنڭ (رح) فقرهسيدر
عزيز استادم أفنديم!
«بو عجيب زمانڭ أڭ بيوك تهلكهسى، حديثِ شريفله ثابت اولان آخر زمانده چوق أهلِ سفاهت و غفلت دنيادن ايمانسز چيقمق يارهسنى لسانِ قرآنِ معجز البيانله، قبره ايمان ايله گيرمك علاجيله تداوى ايدن رسالة النور شاكردلرينه بر حجّتِ قاطعه بخش ايدن رسالة النوره خدمت، عجبا عاجز إنسانلرڭ جزئى و فضلِ
___
(حاشيه): بو دعا خارقه بر صورتده قبول اولدى، پك چابوق قورتولديلر.