هم عين بو هنگاملرده، أڭ زياده حياتِ دنيويهدهكى وظيفهمى دوشونوب وفاتمدن صوڭره شاكردلر بو دهشتلى زمانده بنم بدلمه ده او وظيفهيى ياپاجقلر مى دييه چوق مراق ايدركن؛ بردن دڭزلى، ميلاس، إسپارطه، اينهبولى، اميديمڭ يوز درجه فوقنده اويله صحابتكارانه و إلتزامپرورانه او وظيفهيه قوشوب، باشقهلرى ده و معلّم و عالملرى قوشديرديلر كه؛ بنى حيرت حيرت ايچنده بيراقديلر.
الحاصل: بو بش جهتدهكى توافق، ظاهر بر كرامتِ نوريهدر.
﴿اَلْحَمْدُ لِلّٰهِ هٰذَا مِنْ فَضْلِ رَبّٖى﴾
قارداشلرم! مراق ايتمهيڭز، جوشن و أورادِ بهائيه بو دفعه دخى او دهشتلى زهرڭ تهلكهسنه غلبه ايتدى؛ تهلكه دورهسى گچدى، فقط خستهلق دوام ايدييور.
عموم قارداشلريمه برر برر سلام و سلامتلرينه دعا ايدوب، شبههسز مقبول اولان دعالرينى ايسترم. و اينهبوليده و جوارنده هم چوق خانملرڭ، هم كوچوجك ياورولرينڭ رسالۀِ نورى يازمغه بشلامالرينى و قرآن درسنى چوق معصوملرڭ آلماسنى بتون روح و جانمزله تبريك ايدييورز.
اَلْبَاقِى هُوَ الْبَاقِى
سعيد النورسى
* * *