گورمييور گبى، يالڭز او بيچارهنڭ موهوم بر خطاسنى، سكز سنهده سكسان مدقّقلرڭ نظرنده صاقلانان و سطحى و عنادى نظرينه گوره بر إجتهادى ياڭليشنى گورويور ظنّيله ذمّ ايتمك؛ ألبته بو عصرده، بو مملكتده قرآنِ معجز البيانڭ قصدًا إشارتنه مدار اولابيلير عظيم بر حادثهدر. بنجه، قرآنڭ ناصلكه هر سوره و بعضًا بر آيت و بعضًا بر كلمه بر معجزه اولور؛ اويله ده بو آيتڭ تك بر إشارتى، إخبارِ غيب نوعندن بر لمعۀِ إعجازيهدر.
بو آيتڭ بو إشارتى، بو عصرده، رسالۀِ نور شاكردلرينڭ حقّندهكى غيبته باقديغنه اوچ أماره وار:
برنجيسى: برنجى شعاع اولان إشاراتِ قرآنيه رسالهسنده، رسالۀِ نوره و ترجماننه إشارت ايدن بشنجى آيت اولان (اَوَمَنْ كَانَ مَيْتًا فَاَحْيَيْنَاهُ وَجَعَلْنَا لَهُ نُورًا يَمْشٖى بِهٖ فِى النَّاسِ) غايت قوّتلى قرينهلرله (مَيْتًا) كلمۀِ قدسيهسى جفر و أبجد حسابيله و اوچ جهتِ معناسيله سعيد النورسىيه توافق ايتمهسيدر.
ايكنجى أماره: (اَيُحِبُّ اَحَدُكُمْ) إلى آخر... آيتنڭ مقامِ جفريسى و رياضيسى بيڭ اوچ يوز آلتمش بر (١٣٦١) ايتمهسيدر؛ عين تاريخده، او عجيب حادثه اولدى.
اوچنجى أماره: او محترم إختيار ذاتى اونوتمق، بلكه شخصمه قارشى تزييفاتنى إختيارلغنه و چوق جهتلرله مابيْنمزدهكى اخوّته حرمةً حلال ايتمگه قرار ويرديگم و بز خدمتكار اولديغمز قرآنه حواله ايدوب بيراقديغم هنگامده، بردن إختيارم خارجنده، بش وجهله ذمّى ذمّ ايدن، معجزانه غيبتدن آلتى جهتله زجر