هدايتنى نشر ايدن بر كتابِ مبيندر. و مادام ظاهرًا اوندن داها ايلرى، او وظيفهيى آغير شرائط آلتنده ياپانلرى گورمييورز. و مادام آيتلر، سائر كلاملر گبى جزئى بر معنايه منحصر اولاماز. و مادام دلالتِ ضمنى و إشارى ايله قاعدةً مفهومِ كلامده داخل اولويور. و مادام نجم الدّينِ كبرا و محيى الدينِ عرب گبى چوق أهلِ ولايت، معناىِ ظاهريدن باشقه باطنى و إشارى معنالر ايله أكثر آياتى تفسير ايتمشلر؛ حتّى تفسيرلرنده موسى (عس) و فرعوندن مراد، قلب و نفسدر ديدكلرى حالده اُمّت اونلره ايليشمهمش؛ بيوك علمادن چوقلرى اونلرى تصديق ايتمشلر. ألبته آيتڭ دلالتِ ضمنى ايله رسالۀِ نوره قوّتلى قرينهلرله إشارتى قطعيدر، شبهه ايديلمهمك گركدر.
تحليل:
(قَدْ جَٓاءَكُمْ) يوز آلتمش طوقوز (١٦٩). (مِنَ اللهِ) يوز أللى يدى (١٥٧). (نُورٌ) تنوين ايله برابر اوچيوز آلتى ٣٠٦). (وَكِتَابٌ مُبٖينٌ) آلتى يوز اوتوز بر (٦٣١). (يَهْدٖى بِهِ اللّٰهُ) يوز اوچ (١٠٣). يكونى، بيڭ اوچيوز آلتمش آلتى (١٣٦٦). أگر مدّهلر، اوقونميان همزهلر صاييلمازسه، بو سنهكى محرّم تاريخنه؛ يعنى بيڭ اوچيوز آلتمش ايكىيه تمام توافق ايدر. أگر (مُبٖينٌ) دهكى تنوينده وقف ايديلسه، بيڭ اوچ يوز اون آلتيدر (١٣١٦) كه؛ هم رسالۀِ نورڭ مقدّماتنه، هم تنوين ايله تكمّلنه و برنجى شعاعده بيان ايديلديگى گبى، چوق آياتڭ أهمّيتله گوستردكلرى عين مشهور تاريخه توافق ايدر.
* * *