رؤيامڭ، هم قدّوس قوشنڭ تعبيرينى إثبات ايتدى. (كه، تصادف اولماديغنى گوستردى.) عجبا أمثالسز بر طرزده هم سرچه قوشى عجيب بر صورتده، هم قدّوس قوشى غريب بر صورتده گلوب باقماسى، صوڭره غائب اولماسى و معصوم چوجغڭ رؤياسى تام تامنه چيقماسى، هم رسالۀِ نورڭ حافظ على گبى بر ذاتڭ أليله بورايه گلمهسنڭ عين زماننه توافقى هيچ تصادف اولابيلير مى؟ هيچ بر إحتمالى وار مى كه، بر بشارتِ غيبيه اولماسين؟ (حاشيه)
أوت بو مسئله، كوچك بر مسئله دگل؛ كائنات و حيوانات ايله دخى علاقهداردر. بن رسالۀِ نورڭ بر شاكردى اولمق إعتباريله، اونڭ سربستيتندن كندى حصّهمه دوشن بو كار و نتيجهيى، بيڭلر آلتون ليرا قدر قزانجم وار قناعت ايدييورم. باشقه يوز بيڭلر رسالۀِ نور شاكردلرى و تقويۀِ ايمانه محتاج أهلِ ايمانڭ إستفادهلرى بوڭا قياس ايديلسين.
أوت دينڭ و شريعتڭ و قرآنڭ يوزدن زياده طلسملرينى، معمّالرينى حلّ و كشف ايدن و أڭ معنّد دينسزلرى صوصديروب إلزام ايدن و معراج و حشرِ جسمانى گبى عقلدن چوق اوزاق ظن ايديلن قرآن حقيقتلرينى أڭ متمرّد و أڭ
___
(حاشيه): هم بو قوشلرڭ رسالۀِ نورله علاقهدارلقلرينى تأييد ايدن چوق أمارهلر وار. أزجمله، او قوشلرڭ علاقهدارلغنى گوسترن مكتوب ميلاسه گيتديگى عين وقتده غريب بر طرزده قدّوس قوشى او مكتوبڭ مئالنى وضعيتيله تأييد ايتديگى گبى؛ عين مكتوب اينهبوليده گيجهلين اوقونوركن بيوك بر گيجه قوشى خارقه بر طرزده پنجرهيه گلوب قاناديله ووروب طوروب ديڭلهمسى؛ عين مكتوب صاوهده اوقونوركن بر دفعه ايكى چكرگه اوستنه گلوب طوروب نتيجهيه قدر طورمالرى؛ بر دفعه ده بلبل و سرچه قوشلرى عين مكتوبڭ اوقونماسنده پروانه گبى اوچوب علاقهدارلق گوستروب علاقهدارلغنى گوسترمسى گبى چوق أمارهلر، بو كرامتِ نوريهيى تأييد ايدييور.