يگانهسى، ايمان و أعمالِ صالحه اولديغى گبى و مفهومِ مخالفيله، او خسارتڭ ده سببِ يگانهسى كفر و كفران، شكرسزلك يعنى ايمانسزلق، فسق و سفاهت اولديغنى گوستردى. سورۀِ (وَالْعَصْرِ) ڭ عظمت و قدسيتنى و قيصهلغيله برابر غايت گنيش و اوزون حقائقڭ خزينهسى اولديغنى تصديق ايدهرك، جنابِ حقّه شكر ايتدك.
أوت عالمِ إسلام، بو عصرڭ خسارتى اولان بو دهشتلى ايكنجى حربِ عموميدن قورتولماسنڭ سببى، قرآندن گلن ايمان و أعمالِ صالحه اولديغى گبى؛ فقيرلره گلن آجى آجلق و قحطڭ سببى، اوروجڭ طاتلى آجلغنى چكمدكلرى؛ و زنگينلره گلن خسارات و ضايعاتڭ سببى ده، زكات يرنده إحتكار ايتمهلريدر. و آناطولينڭ بر ميدانِ حرب اولمامسنڭ سببى؛ (اِلَّا الَّذٖينَ اٰمَنُوا) كلمۀِ قدسيهسنڭ حقيقتنى فوق العاده بر صورتده يوز بيڭ إنسانلرڭ قلبلرينه تحقيقى بر طرزده درس ويرن رسالۀِ النور اولديغنى، پك چوق أمارهلرله و شاكردلرندن بيڭلر أهلِ حقيقت و دقّتڭ قناعتلرى إثبات ايدر.
أزجمله: أمارهلردن برى، رسالۀِ نوره صيقنتى ويرن وياخود خدمتندن چكيلن پك چوق آدملرڭ طوقات ييمهلرى گبى؛ بو سنه، بو مملكتڭ أطرافنده عمومى بر طرزده رسالۀِ نورڭ إنتشارينه صيقنتى ويروب شيمديكى بر نوع توقّف دورهسى ويرمك خطاسيله، شيمديكى عمومى صيقنتينڭ بر سببى اولديغنى گوسترمسيدر.
* * *