صاريلى بر هديه إحسان ايتسه؛ ألبته او بيچاره آدم، او پك بيوك ذاته قارشى، هديهسنڭ بيڭلر مِثلندن فضله تشكّر ايتمك ايستر. و بيڭ او هديه قدر قيمتلى بولونان، او هديه ايله گوستريلن إلتفاته قارشى، نه قدر تشكّرده إسراف و إفراط ده ايتسه مقبولدر. و او چوق مبارك ذاتڭ هديهسنه صارديغى كاغدلرى ده تبرّك دييوب شكر گبى يهسه، حتّى او هديه ايچندهكى جويزلرڭ قابوقلرينى ده تبرّك دييوب أكمك گبى يهسه باشنه قويسه، إسراف اولماديغى گبى؛ رسالة النور يوزنده إرادۀِ عامّهده، عنايتِ خاصّه إلتفاتى توافق ظرفيله إحسان ايديلمش. ألبته توافقه دائر تفصيلات، تصويرات فعلى تشكّراتڭ بر نوعيدر و سَوينجڭ و منّتدارلغڭ هيجانلى بر ترشّحاتيدر. أوت بويله بر ذاتڭ إلتفاتنى گوسترن مادّى قرق پاره إحساننه قارشى قرق بيڭ ليرايه دگر إلتفاتنه قارشى نه قدر تشكّر أيلهسه، إسراف دگل.
سعيد النورسى
* * *
عزيز صدّيق قارداشلرم!
سزڭ فوق العاده صداقت و علوِّ همّتڭزدن ترشّح ايدن بر هفته أوّلكى مكتوبڭزه قارشى حسنِ ظنّڭزى بر درجه جرح ايدن بنم جوابمڭ حكمتى شودر كه:
بو زمانده اويله فوق العاده حاكم جريانلر وار كه، هر شيئى كندى حسابنه آلديغى ايچون، فرضا حقيقى بكلهنيلن او ذات دخى بو زمانده گلسه، حركاتنى او جريانلره قاپديرمهمق ايچون سياست عالمندهكى وضعيتدن فراغت ايدهجك و هدفنى دگيشديرهجك دييه تخمين ايدييورم.