محرم اولان سرِّ اِنَّا اَعْطَيْنَاده جفر ايله إستخراجم، عينًا مناظرات رسالهسنده «بر نور چيقهجق، گورهجگز» دييه غيبى مژدهلردهكى گبى، إلهامى و حق بر حقيقتى، فكرمله تطبيقاتمده بر قصور واردى. او قصور، بنى بر زمان دوشونديرييوردى. مناظرات و سنوحات گبى رسالهلردهكى مژدۀِ نوريهيى، رسالۀِ نور حلّ ايتدى. دائرۀِ سياسيه يرينه، يوكسك بر دائرۀِ نوريه ايله او قصورى إزاله ايتديگى گبى، محرم سرِّ اِنَّا اَعْطَيْنَاده اون ايكى، اون اوچ سنه صوڭره «إسلاميته ضربه وورانلرڭ باشلرينه اويله مدهش بر پاطلاييش اولاجق كه، قيامته قدر اونوتلميهجق» مئالندهكى إستخراجِ جفرى چوق گنيش بر دائرهده اولديغى حالده، نور سرّينڭ عكسنه اولارق طار بر دائرهده و خصوصى بر حكومتده تطبيق ايتمك صورتيله، فكرم او گنيش دائرهيى إحاطه ايدهميهرك او حقيقتڭ صورتنى دگيشديرمش. حالبوكه او إستخراجڭ گوسترديگى عين تاريخده، او رژيمڭ مؤسِّسى و باشى دنيادن گوچدى، ضربهسنى يدى. و عين سنهده، پرده آلتنده بيلينمهين و كُرۀِ أرضڭ أكثريسنى و نوعِ بشرڭ قسمِ أعظمنى إستبدادى آلتنه آلان بر مدهش جريانڭ دوگومى و دوگمهسى و معنًا باشى و أڭ مدهش اولان او گوچوب گيدن آدم، طوقات يديگى عين زمانده، داها سنه تمام اولمادن، او مدهش جريانڭ بتون باشلرى و طرفدارلرى اويله سماوى و مدهش طوقاتلره و شدّتلى فورطنهلى مصيبتلره طوتولمهيه باشلاديلر كه، قيامته قدر عذابنى چكهجكلر و چكييورلر. و أديانِ سماويه و إسلاميته ايتدكلرى جنايتلرڭ جزاسنى، چوق گنيش بر دائرهده گورديلر و گورويورلر. ميمسز مدنيتڭ بو إستفراغ و قوصمهسى ايله دنيايى ملوّث ايتدكلرى ايچون، عين إستخراجڭ گوسترديگى تاريخده، او مدنيتڭ باشنه اويله سماوى طوقات ايندى كه، أڭ قراڭلق وحشتدن داها آشاغى اينديردى.