ايتمگه چاليشديغى بر هنگامده خضر گبى برى چيقار، دير: «مأيوس اولمه! سنڭ اويله صارصيلماز بر نقطۀِ إستنادڭ و اويله مغلوب اولماز محتشم اوردولرڭ، توكنمز إحتياط قوّتلرڭ وار كه؛ دنيا طوپلانسه قارشيسنه چيقاماز، كائناتى طاغيدهميان اونى طاغيدهماز. شيمديلك مغلوبيتڭ سببى، بر جماعته و بر شخصِ معنوىيه قارشى بر نفرى گوندرمڭزدر. چاليش كه، هر بر نفرڭ، إستناد نقطهلرى اولان دائرهلردن معنًا إستفاده ايتديگى قوّتلى قوّۀِ معنويه ايله بر شخصِ معنوى و بر جمعيت حكمنه گچسين.» ديدى و تام قناعت ويردى.
عينًا اويله ده، أهلِ ايمانه هجوم ايدن أهلِ ضلالت، (بو عصر جماعت زمانى اولديغى جهتله) جمعيت و قوميتهجيلك مايهسيله بر شخصِ معنوى و بر روحِ خبيث اولمش، مسلمان عالمندهكى وجدانِ عمومى و قلبِ كلّىيى بوزويور. و عوامڭ تقليدى اولان إعتقادلرينى حمايه ايدن إسلامى پردۀِ علويهيى ييرتييور و حياتِ ايمانيهيى ياشاتان، عنعنه ايله گلن حسّياتِ متوارثهيى يانديرييور. هر بر مسلمان تك باشيله بو دهشتلى يانغيندن قورتولمغه مأيوسانه چابالاركن، رسالۀِ النور (رسالة النور) خضر گبى إمداده يتيشدى. كائناتى إحاطه ايدن صوڭ اوردوسنى (حاشيه) گوستروب و اوندن مقاومتسوز مادّى و معنوى إمداد گتيرمك خدمتنده خارقه بر أمربر نفرى اولارق آيت الكبرا رسالهسنى إمامِ على رضى اللّٰه عنه كشفًا گورمش، أهمّيتله گوسترمش.
تمثيلدهكى سائر نقطهلرى تطبيق ايديڭز، تا او سرّڭ بر خلاصهسى گورونسون.
سعيد النورسى
* * *
___
(حاشيه): كائناتى طاغيتميان بر قوّت او اوردويى بوزاماز.