ايكنجى يول: ايمانِ بِالغيب جهتنده سرِّ وحيڭ فيضيله برهانى و قرآنى بر طرزده، عقل و قلبڭ إمتزاجيله حقّ اليقين درجهسنده بر قوّت ايله، ضرورت و بداهت درجهسنه گلن بر علم اليقين ايله حقائقِ ايمانيهيى تصديق ايتمكدر. بو ايكنجى يول؛ رسالۀِ نورڭ أساسى، مايهسى، تملى، روحى، حقيقتى اولديغنى خاص طلبهلرى گورويورلر. باشقهلرى دخى إنصافله باقسهلر، رسالۀِ نورڭ حقائقِ ايمانيهيه مخالف اولان يوللرى غيرِ ممكن و محال و ممتنع درجهسنده گوسترديگنى گورهجكلر.
ايكنجى أماره: رسالۀِ نورڭ صادق شاكردلرينڭ حسنِ عاقبتلرينه و ايمانِ كامل قزانمالرينه او درجه كثرتلى و مقبول و صميمى دعالر اولويور كه، او دعالرڭ ايچنده هيچ برى قبول اولمامسنه عقل إمكان ويرهمييور.
أزجمله: رسالۀِ نورڭ بر خادمى و بر تك شاكردى، يگرمى درت ساعتده لا أقل رسالۀِ نور طلبهلرينڭ حسنِ عاقبتلرينه و سعادتِ أبديهيه مظهر اولمالرينه، يوز دفعه رسالۀِ نور طلبهلرينه ايتديگى دعالرى ايچنده هيچ اولمازسه يگرمى اوتوز دفعه سلامتِ ايمانلرينه و خصوصى حسنِ عاقبتلرينه و ايمان ايله قبره گيرمهلرينه عين دعايى أڭ زياده قبوله مدار اولان شرائط ايچنده ايدييور.
هم رسالۀِ نور طلبهلرى بو زمانده هر جهتدن زياده هجومه معروض ايمان خصوصنده بربرينه سلامتِ ايمان حقّندهكى صميمى، معصوم لسانلريله دعالرينڭ يكونى اويله بر قوّتدهدر كه، رحمت و حكمت اونڭ ردّينه مساعده ايتمز. فرضا مجموعى إعتباريله ردّ ايديلسه ده، تك بر دانه اونلرڭ ايچنده قبول اولونسه، ينه هر برى سلامتِ ايمان ايله قبره گيرهجگنه كافى گلييور. چونكه هر بر دعا عمومه باقار.
سعيد النورسى
* * *