إلٰهيهدر. جنابِ حق معنًا دييور كه: بن دعايى قبول ايدييورم، فقط شيمدى ياغمور ويرمييورم.» ديمك صوڭره سورۀِ يٰس شفاعت ايدهجك. و نتهكيم ده اويله اولمشدر.
الحاصل: إسپارطهدهكى قارداشلريمزڭ عمومى رحمت ايچندهكى رسالۀِ نورڭ بركتنه دائر دعوا ايتدكلرى خصوصيتى، شو ايكى قوّتلى دليل ايله تصديق ايدييورز.
شمعى، مصطفى چاوش، بكر بك، مهاجر حافظ أحمد، سليمان (رح)
* * *
صداقتده مشهور اولان بارلالى سليمانڭ وظيفۀِ صداقتنى تماميله ياپان إسپارطه سليمانى رشدينڭ بر فقرهسيدر.
عزيز استادم!
قارداشلريمڭ يگرمى يدنجى مكتوبه گيرن فقرهلرينى، كندى فكريمه و حسّياتمه موافق بولديغمدن، اونلر بو نقطۀِ نظردن كندى فقرهلرمدر دييه باشقه فقره يازمغه لزوم گورمدم. فقط بو آخرلرده رسالۀِ نورڭ كرامتنه تماس ايدن بعض حادثهلر بنمله ده مناسبتدار اولارق وجوده گلديگندن، اوندن بر إخطار حكمنده ايدى كه، اونلر مناسبتيله بنم ده بر خصوصى فقرهم قارداشلريمڭ خصوصى فقرهلرى ايچنه گيرسين دييه او حادثهلردن بعض لطيف توافقاتى و بعض رؤياىِ صادقهيى و بر قاچ حادثهيى يازييورم.