يوز سنه صوڭره، عينًا درت جهتده توافق ايدهرك رسالۀِ نور أجزالرى عين وظيفهيى گورمشدر. قناعت ويرر كه (نصِّ حديثله) رسالۀِ نور تجديدِ دين خصوصنده بر مجدّد حكمندهدر.
بنم استادم دائما دييور كه: «بن بر نفرم، فقط مشير خدمتنى گورويورم. يعنى قيمت بنده دگل. بلكه قرآنِ حكيمڭ فيضندن ترشّح ايدن رسالۀِ نور أجزالرى، بر مشيريتِ معنويه خدمتنى گورويور.»
استاديمى قيزديرمامق ايچون شخصنى ثنا ايتمييورم.
شاملى حافظ توفيق
* * *
رأفت بك و خسرو و رشدى گبى رسالۀِ نور شاكردلرينڭ رسالۀِ نور بركتنه إشارت ايدن بولدقلرى بر توافقِ لطيفدر.
رسالۀِ نورڭ إسپارطهيه نه درجه رحمت اولديغنه دلالت ايدن بر توافقاتِ عجيبه:
رسالۀِ نورڭ مظهر اولديغى عناياتڭ كلّيتندن مهمّ بر فردى ده شودر كه: إسپارطه ولايتى سكز سنهدن بَرى رسالۀِ نورڭ مؤلّفنى سينهسنده صاقلامشدى و بارلا گبى شيرين بر ناحيهسنده (جنابِ حقّڭ لطف و كرميله) محافظه ايتمشدى. بو مدّت ظرفنده يواش يواش إنتشار ايدن رسالۀِ نوردن بيڭلر آدم إسپارطهده ايمانلرينى تقويه ايتديلر. بِالخاصّه گنجلر پك چوق إستفاده و إستفاضه ايتدى.