حديثِ صحيحده واردر كه، رسولِ أكرم (عصم) فرمان ايتمش:
﴿اِنِ اسْتَقَامَتْ اُمَّتٖى فَلَهَا يَوْمٌ وَاِلَّا فَنِصْفُ يَوْمٍ﴾
(أو كما قال) شو حديثِ شريفه هر ناصلسه قيامته إشارت صورتنده معنا ويريلمش؛ معجزۀِ نبويه گيزلنمش، آڭلاشيلمامش. هم شيخِ گيلانى (رض)، هم حضرتِ علىنڭ (رض) إرشادِ نبوى ايله، بشنجى و آلتنجى و اون دردنجى عصرلرڭ فتنهلرندن كرامتكارانه بحثلرى گوسترييور كه؛ بو حديثِ شريف اونلرڭ بو زمانه باقمق ايچون بر تلسقوبلريدر كه، بو ايكى عصره باقييورلر. أوت حديثده «يوم» تعبيرى، (اِنَّ يَوْمًا عِنْدَ رَبِّكَ كَاَلْفِ سَنَةٍ مِمَّا تَعُدُّونَ) آيتنڭ دلالتيله بيڭ سنهدن عبارتدر. خلافتِ إسلاميه و حكومتِ عربيه، حديث موجبنجه تام إستقامتله گيتمديگى ايچون، تام نصفِ يوم اولان بش يوز كسور سنهده (حاشيه) هلاكو هجوميله خاتمه ويريلدى. اوچ درت عصر زمانِ فترتدن صوڭره (يَاْتِى اللهُ بِقَوْمٍ يُحِبُّهُمْ وَيُحِبُّونَهُ) آيتنڭ سرّينه مظهر اولان عثمانلى عادل پادشاهلرى، حديثِ شريفدهكى إستقامتى يرينه گتيرمگه چاليشدقلرندن، حديثڭ حكميله اُمّت ايچون بيڭ سنه خلافتِ إسلاميهيى و شرعِ شريف اوزرنده گيدن حكومتڭ إدامهسنه واسطه اولديلر. حديثڭ ايكنجى جهتى كه، (فَلَهُمْ يَوْمٌ) ده تحقّق ايدييور.
___
(حاشيه): حديثڭ حكميله حكومتِ عربيه بش يوز سنه ياشايهجق. حالبوكه، بش يوزدن بر مقدار گچر. بونڭ سرّى شودر كه: يزيد، وليد، حَجّاجِ ظالم گبى ظلمهنڭ و أبو مسلمِ خُراسانينڭ تحكّمى و أمويلرڭ إنقراضندن صوڭره عبّاسيلرڭ تام تقرّرينه قدر اولان زمان حكومتِ عربيهنڭ فترت زمانى صاييلديغندن، بو فترت زمانى طىّ ايديلمكله تام بش يوز قالير.