برباد بر طرزده سنّتِ سنيهيه مخالفت ايدن بر قسم علماء السوء و ظلمهلرڭ إستيلاسى زماننده، رسالۀِ نور واسطهسيله رسالۀِ نور شاكردلرى بتون قوّتلريله سنّتِ سنيهنڭ محافظهسنه و آلِ بيتڭ حرمتنه و مودّتنه چاليشمالرى و او مدهش مهالكه قارشى صارصيلمدقلرى حالده، إمدادِ روحانىيه و قوّۀِ معنويهنڭ تقويهسنه پك چوق محتاج اولدقلرى بر زمانده، او علومِ أوّلين و آخرينى بيلديگنى مفتخرانه إدّعا ايدن حضرتِ على (رض) ممكن ميدر كه، أولادندن اولان غوثِ گيلانىدن (رض) گرى قالسين، شجاعتِ حيدرانهسيله رسالۀِ النور شاكردلرينڭ إمدادينه يتيشمهسين؟ ألبته بو صورتله يتيشير و يتيشدى.
معلومدر كه؛ مثلا عموم بر جماعت ايچنده برى حركت ايتسه، برى ديسه: «أى إنسان بڭا باق!» او «إنسان» لفظِ عموميسنده قرينۀِ حال ايله، او معيّن آدمه خطابدر. مادام مقتضاىِ حال و قرينۀِ حال ايله حضرتِ علىنڭ (رض) عموم مخاطبلرى ايچنده أڭ زياده محتاج و أڭ زياده حضرتِ علىنڭ (رض) مقصدى لهنده حركت ايدن، رسالۀِ نور شاكردلريدر. ألبته او ذات إستقباله باقوب و (يَا اَيُّهَا الْاِخْوَان) تعبيرى ايله قونوشديغى جماعت ايچنده أڭ زياده متحرّك و قوّۀِ معنويهنڭ تقويهسنه محتاج اولانلره خصوصيتله باقار.
بشنجى أماره:
أجنبى حروفاتنى أهلِ إسلامڭ أڭ مهمّ حكومتى رسمى بر صورتده قبول و نشر و جبر ايتديگى حالده، رسالۀِ نور شاكردلرى بتون قوّتلريله خطِّ قرآنىيى خارقه بر صورتده نشر و تعميم ايله محافظهسنه چاليشدقلرى بر زمانده، حضرتِ على (رض) تاريخيله اوندن خبر ويرمكله غيبى كراماتى بيان ايتديگى يرده علماء ايچنده بريسنه إلتفات گوسترييور. ألبته بو إلتفاتڭ گرچه چوق أفرادى اولابيلير. فقط بو قرينۀِ حال گوسترييور كه؛ رسالۀِ نور شاكردلرى بر خصوصيت كسب ايتمش كه، حضرتِ على (رض) إلتفاتيله رسالۀِ نورى آلقيشلايور.