اوننجى آيت:
﴿يُؤْتِى الْحِكْمَةَ مَنْ يَشَٓاءُ﴾
اون برنجى آيت:
﴿وَيُعَلِّمُهُمُ الْكِتَابَ وَالْحِكْمَةَ وَيُزَكّٖيهِمْ﴾
اون ايكنجى آيت:
(وَيُزَكّٖيكُمْ وَيُعَلِّمُكُمُ الْكِتَابَ وَالْحِكْمَةَ) آيتلريدر. مئالِ إجماليلرى دير كه: «قرآن حكمتِ قدسيهيى سزه بيلديرييور. سزى معنوى كيرلردن تميزلنديرييور.» بو اوچ آيتڭ كلّى و عمومى معنالرنده رسالۀِ النور قصدى بر صورتده داخل اولديغنه ايكى قوّتلى أماره وار.
بريسى شودر كه: رسالۀِ النورڭ مستثنا بر خاصّهسى، إسمِ حَكم و حكيمڭ مظهرى اولوب بتون صفحاتنده، مباحثنده نظام و إنتظامِ كائناتڭ آيينهسنده إسمِ حَكم و حكيمڭ جلوهلرى اولان حكمتِ قدسيهيى و حِكَمِياتِ قرآنيهيى درس ويرييور. موضوعى و نتيجهسى، حكمتِ قرآنيهدر.
ايكنجى أماره: برنجى آيت بيڭ اوچ يوز يگرمى ايكى (١٣٢٢) ايدهرك مقامِ أبجدى ايله رسالۀِ النور مؤلّفنڭ طوغريدن طوغرىيه علومِ آلِيَهدن باشنى قالديروب حكمتِ قرآنيهيه متوجّه اولارق خادمُ القرآن وضعيتنى آلديغى تاريخدر كه، بر سنه صوڭره إستانبوله گيتمش معنوى مجاهدهسنه باشلامش.
ايكنجى آيت ايسه: مقامِ جفريسى بيڭ اوچ يوز ايكى (١٣٠٢) ايدهرك رسالۀِ نور مؤلّفنڭ قرآن درسنى آلديغى تاريخه تام تامنه توافق ايله رمزًا قرآنڭ باهر بر برهانى اولان رسائل النوره باقار.
اوچنجى آيت ايسه: بيڭ اوچ يوز اوتوز سكز (١٣٣٨) اولديغندن حكمتِ قرآنيهيى آوروپا حكماسنه قارشى پارلاق بر صورتده گوسترهبيلن و گوسترن رسالۀِ