﴿بِاسْمِهٖ سُبْحَانَهُ ۞ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ اَبَدًا دَائِمًا﴾
عزيز، صدّيق، مبارك قارداشلرم!
أوّلا: مدرسة الزهرا أركانلرينڭ آرزولريله ويريلن بر درسڭ بر خلاصهسنى سزلره ده سويلهمگى مناسب گوردك. او درسڭ موضوعى ده: عموم كائنات موجوداتى حسابنه معراج گيجهسنده، فخرِ كائنات و نتيجۀِ خلقتِ عالم پيغمبر عليه الصلاة والسلام، حضورِ إلٰهيده نوعِ بشرڭ، بلكه عموم ذىحيات، بلكه عموم مخلوقات نامنه سلام يرنده (اَلتَّحِيَّاتُ اَلْمُبَارَكَاتُ اَلصَّلَوَاتُ اَلطَّيِّبَاتُ لِلّٰهِ) ديمسى؛ و ايچنده بر كلّى معنا بولونديغندن بتون اُمّت هر گون چوق دفعه نمازلرنده ذكر ايتمسى ايله و أهلِ ايمان ايچنده، هر بر مرتبه صاحبنڭ بر حصّهسى ايچنده بولونديغى؛ و بوندن أوّل «هو نكتهسى«نڭ حاشيهسنده، راديو واسطهسيله هوا عنصرينڭ خارقه معجزاتِ قدرتى گوسترمسى جهتنده قلبه إخطار ايديلدى كه:
بر أهلِ ايمان، أبدى بر سعادتده، دنيا قدر بر ملكِ باقىيى نتيجه ويرهجك بو قيصهجق عمرِ دنيوىده ايتديگى عبادتده بر كلّى عبادت، عادتا كندى خصوصى دنياسيله برابر عبادت ايتمش گبى كندى خصوصى دنياسى قدر بر مكافات آلاجغى إشاراتِ قرآنيهدن آڭلاشيلير دييه؛ حجّة الزّهرانڭ ايكنجى مقامنده علمِ إلٰهى مبحثنده (اَلتَّحِيَّاتُ اَلْمُبَارَكَاتُ) إلى آخرهنڭ كلّى معنالرى روحمه گلوب، اويلهجه تشهّدده (اَلتَّحِيَّاتُ) ديركن، بردن خيالمه خصوصى دنيامڭ درت عنصرى اولان طوپراق، صو، هوا، نور عنصرلرى درت كلّى ديل اولديلر. هر بر ديل، ميليارلر حتّى تيريليونلر، قطريليونلر عددنجه (اَلتَّحِيَّاتُ اَلْمُبَارَكَاتُ اَلصَّلَوَاتُ اَلطَّيِّبَاتُ لِلّٰهِ) كلمهلرينى لسانِ حال ايله سويلهيورلر؛ خيالًا گوردم.
بو عنصرلردن طوپراق عنصرى بر ديل اولارق بتون ذىحياتلرڭ هر برى بر كلمۀِ ذىحيات اولوب (اَلتَّحِيَّاتُ) ديرلر. چونكه هر بر آووج طوپراق أكثر نباتاته صاقسيلق ايدهبيلير و منشأ اولابيلير بر وضعيتدهدر. او حالده هر بر آووج طوپراقده، يا بتون بشرڭ ميدانه گتيردكلرى بتون فابريقهلرڭ عددنجه معنوى كوچوجك مقياسده فابريقهلر (هر بر آووج طوپراقده) بولونهجق. بو ايسه حدسز درجهده إمكانسز... وياخود بر قديرِ مطلقڭ حدسز قدرتى، نهايتسز علمى و إرادهسيله اولاجق.
ديمك طوپراق عنصرى، بتون أجزاسى ايله و ذرّاتى ايله بو مظهريت ايچون حدسز (اَلتَّحِيَّاتُ لِلّٰهِ) دير. يعنى: أزلدن أبده قدر بتون ذىحياتلرڭ حيات هديهلرى ذاتِ واجب الوجوده خاصدر.
صوڭره هركسڭ خصوصى دنياسندهكى گبى، بنم ده خصوصى دنيامڭ ايكنجى عنصرى اولان صو عنصرى دخى، كلّى بر لسان اولارق بتون ذرّاتى ايله، خصوصًا ذىحياتلرڭ منشألرينه و ياشامهلرينه خدمتلرى نقطهلرنده، تيريليونلر، قطريليونلر عددنجه (اَلْمُبَارَكَاتُ) كلمۀِ مباركهسنى لسانِ حال ايله كائناتده نشر ايدييور.
چونكه صويڭ قطرهلرينڭ گورديگى وظيفهلر، خصوصًا نطفهلرڭ و چكردكلرڭ و تخملرڭ إنتباهنده و اويانوب وظيفۀِ فطريهلرينه مظهر اولمقده و غايت عجيب و گوزل و خارقه او كوچوجك مخلوقلرڭ و ياورولرڭ بيوك و غايت إنتظاملى و مكمّل وظيفهلره مظهريتلرينى بتون ذىشعوره تبريك ايله بارك اللّٰه ديديرن و حدسز بارك اللّٰه، ما شاء اللّٰه ديديرمگه وسيله اولمغه لايق اولان او مباركلرڭ او وضعيتلرى؛ او صو عنصرينڭ هر بر ذرّهسنڭ بيڭلر أفلاطون قدر علمى و بيڭلر حكيمِ لقمان قدر حكمتى و إرادهسى بولونمق لازمدر. بو ايسه، صويڭ ذرّاتى عددنجه محالدر.
اويله ايسه بر قديرِ ذو الجلالڭ و بر رحمٰنِ رحيمڭ حدسز قدرت و رحمت و حكمت و إرادهسيله او مباركلرڭ، او حدسز معجزاته مظهريتلرى جهتنده بتون او مباركلر عددنجه (اَلْمُبَارَكَاتُ لِلّٰهِ) كلمهسنى كلّيتى ايله سويلهدكلرندن، بتون مخلوقات نامنه، معراج گيجهسنده، نتيجۀِ خلقتِ عالم اولان پيغمبريمز عليه الصلاة والسلام (اَلْمُبَارَكَاتُ لِلّٰهِ) ديمش. يعنى: بتون بو مدارِ تبريك و ما شاء اللّٰه و بارك اللّٰه ديديرن بتون حالتلر و صنعتلر ذاتِ ذو الجلالڭ قدرتنه مخصوص اولديغندن، بتون او حدسز (اَلْمُبَارَكَاتُ لِلّٰهِ) لرى جنابِ حقّه، حضوريله هديه ايدييور.
صوڭره، هركسڭ خصوصى دنياسندهكى هوا عنصرى دخى بر هو قدر هر بر آووج هوادهكى هر بر ذرّه، مظهر اولدقلرى سانتراللق، آخذه و ناقلهلك وظيفهلرى ايچنده بتون دعالرى و صلواتلرى و رجالرى و عبادتلرى إفاده ايدن (اَلصَّلَوَاتُ لِلّٰهِ) جملهسنى لسانِ حاللريله ديدكلرى ايچون؛ هوا عنصرى كلّى بر لسان اولارق او حدسز كلماتلرينى قطريليونلر بلكه كنتريليونلر عددنجه سويلهيهرك صانعلرينه، خالقلرينه تقديم ايتدكلرندن اونلرڭ ناملرينه او كلّى معنا ايله رسولِ أكرم عليه الصلاة والسلام جنابِ حقّه (اَلصَّلَوَاتُ لِلّٰهِ) دييه تقديم ايتمشدر. يعنى: «بتون دعالر و إحتياجدن گلن رجالر و نعمتدن چيقان شكرلر و عبادتلر و نمازلر، خالقِ كلّ شيئه مخصوصدر.»
چونكه «هو نكتهسى»نڭ حاشيهسنده دينيلديگى گبى: يا، هو قدر بر آووج هوانڭ هر بر ذرّهسى، عموم ديللرى بيلهجك و سويلهينلرڭ يرلرينى گورهجك و ياقين اوزاق هر شيئى ايشيدهجك و هر شيوهيى و هر حرفڭ طرزينى تام بيلهجك و چوق ايشلرى برابر، شاشيرمادن گورهجك بر قدرتِ مطلقه و إرادۀِ تامّهيه مالك اولاجق. بو ايسه هوا ذرّهلرى عددنجه محال اولماسندن، ألبته و ألبته شبههسز و قطعى بر ضرورتله او ذرّهلرڭ هر برى، صانعِ حكيمى بتون صفاتيله گوستروب شهادت ايدر. عادتا كوچك بر مقياسده عالمڭ بيوك شهادتى قدر شهادتلرى واردر.
ديمك ذرّاتِ هوائيه عددنجه صلواتلرى إفاده ايدن معراجِ أحمدى عليه الصلاة والسلامده (اَلصَّلَوَاتُ لِلّٰهِ) دينيلمشدر.
صوڭره (اَلطَّيِّبَاتُ) كلمۀِ طيّبه سويلنديگى وقت، بردن «نار» ايله «نور» عنصرى يعنى، حرارتلى و حرارتسز مادّى و معنوى نور عنصرى بر كلّى ديل اولارق حدسز و نهايتسز بر صورتده لسانِ حال ايله حدسز ديللر ايله (اَلطَّيِّبَاتُ لِلّٰهِ) دييور.
يعنى: «بتون گوزل سوزلر، گوزل معنالر، خارقه گوزل جماللر و بتون كائناتڭ يوزنده جماللرى گورونن أزلى أسماءِ حسنىنڭ جلوهلرى و باشده أنبيالر، أوليالر، أصفيالر اولارق بتون أهلِ ايمانڭ ايمانلرى ايله كائناتڭ و مخلوقاتڭ گورونن گوزللكلرى و أهلِ ايمانڭ ايمانلرندن نشئت ايدن گوزل سوزلر، حمدلر، شكرلر، توحيدلر، تهليللر، تسبيحلر، تكبيرلر، (اِلَيْهِ يَصْعَدُ الْكَلِمُ الطَّيِّبُ) سرّى ايله عرشِ أعظم طرفنه گيدن او كلماتِ طيّبهلرى و دنيانڭ اوچ عدد يوزندن غايت گوزل اولان أسماءِ إلٰهيهيه آيينهلك ايدن برنجى يوزندهكى حدسز گوزللكلر، طيّبهلر و دنيانڭ آخرت تارلاسى اولان ايكنجى يوزندهكى حدسز حسناتلر، خيرلر و معنوى ميوهلر و گوزللكلر، تماميله أزل أبد سلطانى قديرِ ذو الجلاله مخصوصدر.» دييه، نار و نور عنصرينڭ بو كلّى ديلى ايله بو كلّى عبوديتى، معبودِ ذو الجلاله تقديم ايتمك معناسنده اولارق، فخرِ كائنات عليه الصلاة والسلام عموم مخلوقات حسابنه (اَلطَّيِّبَاتُ لِلّٰهِ) ديمش.
چونكه مادّى و معنوى نور عنصرى، مظهر اولدقلرى وظيفهلرينڭ عمومى هم برابر، هم آيرى آيرى ذاتِ واجب الوجوده إشارت و شهادت ايتدكلرى ميليارلر نمونهلرى وار.
أوت نور و نار عنصرى طوپراق، هوا و ماء عنصرلرى گبى غايت قطعى و بديهى و ضرورى بر صورتده او نمونهلرله گوسترييور كه: بتون أسباب يالڭز بر پردهدر. بتون ايجادلر و تأثيرلر، ذاتِ قديرِ ذوالجلالڭدر. چونكه نور، عينًا وجود و حيات گبى، قدرتِ إلٰهيهنڭ پردهسز بِالذّات مباشرتنه لايق اولماسندن، أسبابِ ظاهرى هيچ بر جهتده پرده اولاماديغندن، واحديت ايچنده أحديتى گوسترر. غايت جزئى و كوچك بر وظيفهده، كلّى و گنيش بر دليلِ أحديته إشارت ايدر كه، «هو نكتهسى» حاشيهلريله بونى غايت قيصهجه إثبات ايدييور. ايشته ميليارلر نمونهلرندن ايكى كوچك نمونهسندن:
بريسى: معنوى نورڭ (علم صورتنده) بشرڭ قفاسنده جلوهسنڭ بر جزئيسى، طيرناق قدر قوّۀِ حافظهيه مالك بر آدمڭ قفاسنده، طقسان كتابڭ كلماتى يازيلمش. و اوچ آيده، هر گونده اوچ ساعت مشغول اولارق، حافظهسنڭ صحيفهسنڭ يالڭز او قسمنى آنجق تمام ايدهبيلمش. عين آدم، سكسان سنه عمرنده گورديگى و ايشيتديگى و مراقنى تحريك ايدن و اوڭا خوش گلن معنالرى و كلمهلرى و صورتلرى و صوتلرى او طيرناق قدر قوّۀِ حافظهنڭ صحيفهسنده ايستديگى وقتده مراجعت ايدوب بر بيوك كتبخانه قدر بتون محفوظاتنڭ عين شيلرينى اوراده بتون ايستدكلرينى موجود و منتظم يازيلمش و ديزيلمش گورويور.
ايشته بو طيرناق قدر قوّۀِ حافظهنڭ، بحرِ عمّان گبى بر وسعتى و گونش گبى بر إحاطهلى نورى و بر ضياءِ معنويسى و زمين يوزى قدر گنيش صحيفهلرى اولمازسه بو حال اولاماز. بو ايسه يوز بيڭلر درجه محال محال ايچنده و إمكانسز اولديغندن؛ ألبته و ألبته بو كوچوجك طيرناق قدر حافظه؛ لوحِ محفوظ، بر صحيفۀِ قدر و قدرتى اولان عليمِ مطلقڭ علم و حكمت و قدرتى ايله، او لوحِ محفوظڭ بر نمونهسنى بشرڭ قفاسنده خلق أيلهمسنه قدسى بر شهادت ايدر.
ايكنجى جزئى و كوچوجك بر نمونهسى: ألكتريقدر. بر آدم، ألكتريق لامباسنڭ عجيب وضعيتنى تدقيق ايتمش. باقييور كه، يوزر دوگمهلردهكى و مركزلردهكى و دمير و ايپ تللرندهكى ذرّهلر و مادّهلر جامد، شعورسز، حركتسز اولدقلرى حالده يالڭز غايت جزئى بر تماس نتيجهسنده، اون كيلومتره يرى طولديران قراڭلق درحال گيدر و يرينى ياريم ثانيهده طولديران بر نور وجوده گلير. بو گوزله گورونن قراڭلغڭ بردن غائب اولماسى و ينه گوزله گورونن او ظلمت قدر نورڭ وجوده گلمهسى ألبته بر خيال دگل، يا او تماس ايدن جامد، شعورسز ذرّهلر، حدسز بر قوّتى و بر نورى كنديلرنده طاشيمقله برابر؛ بردن يوز كيلومتره يرلره ألنى اوزاتوب، قراڭلغى سوپوروب، تميزلهيوب نورلرى طولديرهجق. بو ايسه بتون شيطانلر و دينسزلر، مادّيونلر طوپلانسهلر؛ بونى بر سوفسطائىيه ده قبول ايتديرهمزلر (حاشيه). وياخود بتون كائناته حكمى گچن و بتون نورلر، اونڭ نور إسمندن فيض آلان و نور النور و خالق النور و مدبّر النور اولان قديرِ ذو الجلالڭ و علاّم الغيوبڭ و عليمِ مطلقڭ قدرتى ايله و حكمتى ايله اولاجق. ايشته بو ايكى نمونهيه قياسًا حدسز نمونهلر وار.
___
(حاشيه): يالڭز آلداتمق ايچون بعض درين و أهمّيتلى حقيقتلره بر إسم طاقوب، گويا او حقيقت آڭلاشيلمش گبى عاديلشديرييورلر. مثلا: بو ألكتريق قوّتى ايمش دييوب، او اينجه و درين حقيقتى أهمّيتسز ياپوب عادى گوسترييورلر. حالبوكه قدرتڭ او معجزهسنڭ حكمتلرى ايكى صحيفه ايله آنجق إفاده ايديلديگى حالده؛ بر تك إسم طاقمقله، او حقيقتى و او كلّى حكمتى گيزلهيوب، غايت كوچك و بسيط بر پردهسنى يرينه إقامه ايدهرك؛ او معجزهلى أثرى، كور قوّته و سرسرى تصادفه و موهوم طبيعته إسناد ايدوب، ابو جهلدن داها أجهل بر درجهيه دوشويورلر. ايشته إرادۀِ إلٰهيهنڭ ناموسلرينڭ عنوانلرى اولان عادت اللّٰه قانونلرينڭ بريسنه، بشر عجزندن ماهيتنى بيلهمديگى او قانونڭ ماهيتنه ألكتريق نامنى ويروب، تنويردهكى خارقه معجزۀِ قدرتى عاديلشديرمكله و معلوم بر شى ايمش گبى ألكتريق قوّتى دييه بر إسم طاقمقله، بونڭ گبى چوق خارق العاده معجزاتِ قدرتِ إلٰهيهيى جاهلانه عاديلشديرييورلر.
___
ايشته (اَلطَّيِّبَاتُ لِلّٰهِ) بتون كائناتدهكى نورلرى، گوزللكلرى، طيّبهلرى و كلماتِ طيّبهلرى و خيرلرى و كمالاتلرى ذاتِ ذو الجلاله نور عنصرى ديليله كائنات تقديم ايتديگى گبى؛ نتيجۀِ خلقتِ كائنات و سببِ خلقتِ عالم اولان محمّد عليه الصلاة والسلام دخى ناملرينه مبعوث اولديغى كائناتدهكى بتون موجودات حسابنه، معراج گيجهسنده او كلّى معنا ايله (اَلطَّيِّبَاتُ لِلّٰهِ) ديمش.
رسولِ أكرم (عليه الصلاة والسلام بِعدد ذرّات الأنام) بو درت كلماتِ جميلهيى سلام يرنده سويلهدكدن صوڭره، (رسالۀِ نورده ايضاح ايديلديگى گبى) جنابِ حق (اَلسَّلَامُ عَلَيْكَ اَيُّهَا النَّبِىُّ) ديمهسيله، بتون اُمّتى اويله دييهجكلرينه إشارت و معنوى أمر و فرمان و قبول حكمنده مقابله ايتمش. بردن پيغمبر (اَلسَّلَامُ عَلَيْنَا وَعَلٰى عِبَادِ اللّٰهِ الصَّالِحٖينَ) ديمكله، او قدسى سلامى هم كندينه، هم امّتنه، هم بتون كندندن أوّلكى أمثاللرينه تعميم ايدوب، كلّى و عمومى بر سلام صورتنده گوستروب؛ بتون مخلوقاتڭ مبعوثى اولماسى نقطهسنده اونلره ده او سلامى تشميل ايتمش.
اُمّتى ايسه هر نمازده (اَلسَّلَامُ عَلَيْكَ اَيُّهَا النَّبِىُّ) ديمهلرى، او سلامِ إلٰهيدهكى أمر و فرمانه بر إمتثالدر. هم اوڭا قارشى بيعت ايتمكدر و هر گون بيعتنى يعنى مأموريتنى قبول و گتيرديگى فرمانلره إطاعتلرينى تجديد و تازهلهمكدر. هم رسالتنى بر تبريكدر. هم عموم عالمِ إسلام هر گون بو كلمه ايله اونڭ گتيرديگى سعادتِ أبديه مژدهسنه قارشى بر تشكّردر.
أوت هر إنسان، كندى وجودينڭ محو اولماسى ايله متألّم اولديغى گبى؛ خانهسنڭ خراب اولماسى ايله ده ألم چكييور. و وطننڭ بوزولماسى ايله غايت متأثّر اولويور. أحبابنڭ فراق و وفاتيله دريندن درينه قلبى آجييور. دنيا قدر بيوك، خاص و خصوصى دنياسنڭ زوال و فراق و آخرده تمامًا محو اولماسنى دوشونمسى، معنوى بر جهنّم گبى روحنى و وجداننى يانديرييور.
ايشته عقلى باشنده هر بر آدم روحسز، قلبسز، عقلسز اولمامق شرطيله بيلهجك كه: محمّدِ عربى عليه الصلاة والسلامڭ معراج گيجهسنده گوزى ايله گورديگى سعادتِ أبديهنڭ مژدهسنى و أهلِ ايمانڭ جنّتدهكى حياتِ باقيهسنڭ بشارتنى و إنسانڭ علاقهدار اولديغى سَوْدكلرينڭ محو اولمادقلرينى و اونلرڭ زواللرندن صوڭره ينه گوروشمهلرينڭ محقّق اولاجغنڭ غايت سرورلى، معنوى هديهسنه قارشى عموم عالمِ إسلام هر گون چوق دفعه (اَلسَّلَامُ عَلَيْكَ اَيُّهَا النَّبِىُّ) ديديگى گبى؛ اونڭ ده گتيرديگى هديۀِ معنويهسيله هم كائنات صحيفهلرى و طبقهلرى مكتوباتِ صمدانيه اولماسنه؛ هم مخلوقاتڭ حقيقى قيمتلرى و كمالاتلرى اونڭ رسالتى ايله تظاهر ايتمهسنه مقابل بتون مخلوقات معنًا (اَلسَّلَامُ عَلَيْكَ اَيُّهَا النَّبِىُّ) بو مذكور حقيقتڭ لسانى ايله ديرلر. و اُمّت مابيْننده شعائرِ إسلاميهدن اولان بربرينه (اَلسَّلَامُ عَلَيْكُمْ) ديمهلرى سنّت اولماسى، بو بيوك حقيقتڭ شعاعى اولماسندندر.
اَلْبَاقِى هُوَ الْبَاقِى
سعيد النورسى
* * *
فهرست
يگرمى بشنجى لمعه (خستهلر رسالهسى) ٥
اون يدنجى مكتوب (يگرمى بشنجى لمعهنڭ ذيلى) ٣٨
يگرمنجى مكتوبڭ برنجى مقامى ٤٥
يگرمى طوقوزنجى مكتوبڭ ايكنجى قسمى (رمضان رسالهسى) ٥٩
اون يدنجى لمعه (زهرهدن گلمش نوطهلر) ٧٣
يگرمى ايكنجى مكتوبڭ برنجى مبحثى (اخوّت رسالهسى) ١٢٩
نور عالمنڭ بر آناختاريندن ١٤٦
* * *