(بو مكتوب سابق مكتوبلر گبى مدرسة الزّهرا أركانلرينه عين زمانده ويرديگى درسلرندن اولمق مناسبتيله آرقهسنه إلحاق ايديلدى)
﴿بِاسْمِهٖ سُبْحَانَهُ﴾
عزيز، صدّيق قارداشلرم!
أوّلا: مولدِ شريفڭزى روح و جانمزله تبريك ايدييورز و موفّقيتڭزى و نورلرڭ فوق العاده تأثيرلى إنتشارينى سزلره مژده ايدييورز و نورجيلرى تبريك ايدييورز.
ثانيًا: بو مبارك گيجهده پك شدّتلى بر إخطار قلبمه گلدى كه: إستانبولدهكى اونورسيتهجيلر أسكى سعيدله يڭى سعيدڭ تاريخچۀِ حياتندهكى خارقهلرى يازمالرى مناسبتيله ايكى فكر ميدانه گلمش:
بريسى: دوستلرده بنم حدّمدن پك زياده، فوق العاده بر نوع ولايت گبى بر حسنِ ظن حاصل اولمش. و معارضلرده و أهلِ فلسفهده ده پك خارقه بر دها ظنّى و حتّى بعضيلرنده ده قوّتلى بر سحر توهّميله حدّمدن بيڭ درجه زياده بر توهّم حاصل اولمش. و بو معنايه دائر چوق يرلرده «بونڭ حقيقتى نهدر؟» دييه مادّى و معنوى ايضاحى بندن ايستهنيلمشدى. بن ده بو گيجهدهكى شدّتلى إخطار ايچون چوق مقدّماتلى بر حقيقتى بيان ايتمگه مجبور اولدم.
برنجى مقدّمه: ناصلكه بر چام آغاجنڭ بغداى دانهسى قدر بر چكردگى، قوجه چام آغاجنه بر مبدأ اولويور. قدرتِ إلٰهى او عجيب آغاجى او چكردكدن خلق ايدييور. ميليوندن آنجق بر حصّه او چكردكده بولونوركن، او چكردك قدر قلميله يازيلان معنوى بر فهرسته اولمش. يوقسه بر كوى قدر فابريقهلر لازمدر كه او عجيب آغاج، دال و بوداقلريله تشكيل ايديلسين. ايشته عظمت و قدرتِ إلٰهيهنڭ بر دليلى ده بودر كه، بر ذرّهدن طاغ گبى شيلرى خلق ايدر. ايشته عينًا بونڭ گبى، هيچ بر محويت و تواضع نيّتيله اولميهرق، بتون قناعتمله إعلان ايدييورم كه: بنم خدمتم و سرگذشتۀِ حياتم، بر نوع چكردك حكمنه گچمش. عنايتِ إلٰهيه ايله بو زمانده أهمّيتلى بر خدمتِ ايمانيهيه مبدأ اولمق ايچون قرآندن گلن و ميوهدار بر شجرۀِ عاليه اولان نور رسالهلرينى إحسان ايتمش. بن بونى قَسَمله تأمين ايدييورم كه، بتون حياتمده گچن او خارقهلردن طولايى بن كندمده قطعيًا بر قابليت و بر مزيت و او فوق العادهلگه بر لياقت گورمييوردم. حيرت حيرت ايچنده قالييوردم. دگل فوق العاده بر دها وياخود فوق العاده بر ولايت، بلكه كندى كنديمى إداره ايدهجك و حياتِ إجتماعيه ايله مناسبتدار اولاجق بر قابليت گورمييوردم. گرچه ظاهرًا خودفروشلق گبى بعض حالات حياتمده گورونمشدى. او ده إختيارم خارجنده خلقلرڭ حسنِ ظنّنى تكذيب ايتمهمك ايچون بر نوع خودفروشلق گبى اولويوردى. فقط خلقلرڭ حسنِ ظنّى گبى حقيقتده اولماديغمڭ حكمتنى بيلمديگمدن و دنيايه يارامديغمى، بويله بيڭ درجه حدّمدن فضله بر توجّهه مظهر اولديغمى بتون بتون خلافِ حقيقت تلقّى ايدييوردم. فقط جنابِ حقّه يوز بيڭ شكر اولسون كه، يتمش سكسان سنهلك حياتمڭ صوڭلرنده اونڭ حكمتنى إحسانِ إلٰهيه ايله بر درجه بيلدك و قيصهجه بر قسمنه إشارت ايدهجگم. و چوق نمونهلرندن بر قسم نمونهلرينى بيان ايدييورم:
برنجى نمونه: مدرسه اصولنجه هيچ اولمازسه اون بش سنه تحصيلِ علم لازم گلييور كه حقائقِ دينيه و علومِ إسلاميه تام ألده ايديلسين. او زمانده سعيدده، دگل خارقه بر ذكا ويا بر معنوى قوّت؛ بلكه بتون إستعداد و قابليتنڭ خارجنده بر عجيب طرز ايله بر ايكى سنه صرف و نحو مباديسنى گوردكدن صوڭره اوچ آيده عجيب بر طرزده قرق أللى كتابى گويا اوقومش و إجازت آلمش گبى بر حالت گوروندى.
بو حال آلتمش سنه صوڭره طوغريدن طوغرىيه گوستردى كه، او وضعيت علومِ ايمانيهيى اوچ درت آيده، قيصه بر زمانده أللره ويرهبيلهجك بر تفسيرِ قرآنى چيقهجق و او بيچاره سعيد ده اونڭ خدمتنده بولونهجق إشارتيله؛ هم بر زمان گلهجك كه، دگل اون بش سنه بلكه بر سنه ده علومِ ايمانيه يى درس آلاجق مدرسهلر أله گچميهجك و آزالهجق بر زمانه بر نوع إشارتِ غيبيه گبى معنالر خاطره گلييور.
ايكنجى نمونه: او أسكى زمانده، سعيدڭ او چوجقلق زماننده بيوك عالملرله مناظرهسنى و او عالملرڭ سؤاللرينه جواب ويرمسنى؛ حتّى كنديسى هيچ سؤال ايتمهدن عالملرڭ أڭ مشكل سؤاللرينه طوغرى جواب ويرمسنى، بن قطعيًا إعتراف ايدييورم و إعتقاد ايدييورم كه: او حال نه خارقه ذكاوتمدن و نه ده عجيب إستعدادمدن نشئت ايتمش دگلدر. بن ده بيچاره، مبتدى، سرسم، گورولتيجى بر چوجق ايكن؛ هيچ بويله دگل بيوك عالملره جواب ويرمك بلكه كوچك خواجهلره، حتّى كوچك طلبهلره ده مغلوب اولور بر حالده ايكن طوغرى جواب ويرمكلگم، قطعيًا إستعدادمدن و ذكاوتمدن گلمهمش اولديغنه قناعتِ قطعيهم وار. يتمش سنهدر ده حيرت ايدييوردم. شيمدى إحسانِ إلٰهى ايله بر حكمتنى آڭلادم كه: چكردك گبى مدرسه علملرينه بر آغاج إحسان ايديلهجك و او آغاجڭ خدمتنده بولونانه قارشى پك چوق رقيبلرى و معارضلرى بولونهجق. ايشته بو زمانده إسلاملر ايچنده مختلف مشربلر و مسلكلر صاحبلرى بربريسنى تنقيد ايتمك و أثرينه مقابل أثرلر نشر ايتمك؛ معتزله و أهلِ سنّت گبى بربرينى قيرمق عادتيله بو زمانده او نور آغاجنڭ خدمتكارينڭ باشنه وورهجق و رقابت ويا مشرب مخالفتيله أڭ تأثيرليسى و أڭ مدهشى مدرسه خواجهلرى اولمق لازم گليركن، جنابِ حقّه يوز بيڭ شكر اولسون كه أسكيدن بَرى دوام ايتمكده اولان او عادته مخالف اولارق رسالۀِ نور أڭ زياده علمانڭ طمارلرينه طوقونديرديغى حالده خواجهلرڭ نورلره قارشى تنقيدكارانه أثرلر يازامدقلرينڭ سببى: او زمانده او چوجق سعيدڭ علمانڭ سؤاللرينه قارشى طوغرى جواب ويرمهسى، علمانڭ جسارتنى قيرمش كه، هيچ بر يرده قيصقانج خواجهلردن، هم مشربجه سعيده چوق مخالف اولدقلرى حالده نور رسالهلرينه قارشى مقابل چيقماملرى؛ بو حالڭ بر حكمتى اولديغنه قناعتم گلمش. يوقسه بويله عجيب بر زمانده أهلِ مدرسهنڭ إعتراضى باشلاسه ايدى، دينسزلك طرفدارلرى اولان گيزلى دشمنلريمز هم نورلرى، هم علمايى چوروتمك ايچون أهمّيتلى بر وسيله ياپاجقلردى. جنابِ حقّه حدسز شكر اولسون كه، أڭ زياده نورلرڭ طوقونديغى رسمى علما، عليهنده بولونامديلر.
اوچنجى نمونه: أسكى سعيدڭ چوجقلق زمانندن بَرى هم كنديسى، هم باباسى فقير اولدقلرى حالده، باشقهلرينڭ صدقه و هديهلرينى آلمديغنڭ و آلامديغنڭ و شدّتلى محتاج اولديغى حالده هديهلرى مقابلسز قبول ايتمديگنڭ و كردستان عادتى طلبهلرڭ تعييناتى أهالينڭ أولرندن ويريلديگى و زكاتله مصرفلرى ياپيلديغى حالده، سعيد هيچ بر وقت تعيين آلمغه گيتمديگنڭ و زكاتى دخى بيلهرك آلمديغنڭ بر حكمتى، شيمدى قطعى قناعتمله شودر كه: آخر عمرمده رسالۀِ نور گبى صِرف ايمانى و اُخروى بر خدمتِ قدسيه يى دنيايه آلَت ايتمهمك و منافعِ شخصيهيه وسيله ياپمامق ايچون او مقبول عادته و او ضررسز سجيهيه قارشى بڭا بر نفرت و بر قاچنمق و شدّتِ فقر و ضرورتى قبول ايدوب ألنى إنسانلره آچمامق حالتى ويريلمشدى كه، رسالۀِ نورڭ حقيقى بر قوّتى اولان حقيقى إخلاص قيريلماسين. و بونده بر إشارتِ معنوى حسّ ايدييوردم كه: گلهجك زمانده معيشت درديله أهلِ علمڭ مغلوبيتى، بو إحتياجدن گلهجكدر.
دردنجى نمونه: يڭى سعيد إختيارلغنده بتون بتون سياستدن و دنيادن كندينى چكمگه چاليشديغى حالده، أهلِ دنيانڭ بتون بتون قانونه و إنصافه و وجدانه حتّى إنسانلغه مخالف بر طرزده أشدِّ ظلم ايله يگرمى سكز سنه إشكنجهلرله أزدكلرينه و بر سينگڭ ايصيرماسنه تحمّل ايتمه ين او بيچاره سعيدڭ بالطهلرله باشنه ووردقلرينه و إهانتڭ أڭ شنيعلرينى ياپدقلرينه قارشى، أمثالسز بر صبر و تحمّل اوڭا إحسان اولونماسى و غايت عصبى و سيڭيرلى اولديغى گبى، فطرةً قورقاق اولماديغى حالده «أجل بردر، تغيّر ايتمز» حقيقتنه ايمانندن گلن بيوك بر جسارتله برابر أڭ قورقاق، أڭ مسكين بر وضعيتده سكوت ايدوب صبر ايتمسى؛ حتّى بر مقدار صوڭره او إشكنجهلر صوڭنده روحنه بر فرح ويريلمهسنڭ بر حكمتى، قناعتِ قطعيهمله بودر كه: قرآنِ حكيمڭ حقائقِ ايمانيهسنى تفسير ايدن رسالۀِ نورى هيچ بر شيئه و شخصى منفعتلرينه و معنوى كمالاتلرينه آلَت ياپمامق و حقيقى إخلاصى قيرمامق ايچون أهلِ سياست سعيد حقّنده «دينى سياسته آلَت ياپمق» وهمنى ويروب؛ تا سعيد إشكنجهلرله، حپسلرله دينى سياسته آلَت ايتمهسين دييه أهلِ سياستڭ ظالمانه حكملرى آلتنده قدرِ إلٰهى نوردهكى حقيقى إخلاصى قيرمامق ايچون سعيده شفقتلى طوقاتلر ووروب «صاقين صاقين، حقائقِ ايمانيهنڭ تفسيرى اولان رسالۀِ نورى كندى شخصى منفعتلريڭه، حتّى معنوى كمالاتلريڭه و بلالردن و مضر شيلردن قورتولمقلغڭه آلَت ياپمه. تا كه نورڭ أڭ بيوك قوّتى اولان إخلاصِ حقيقى زدهلنمهسين!» دييه قدرِ إلٰهينڭ شفقتلى طوقاتلرى اولديغنه قطعى قناعت ايدييورم. حتّى هر نه وقت صِرف آخرتمه شخصى عبادتله زياده مشغوليتم سببيله نورڭ خدمتنى بيراقديغم عين زمانده أهلِ دنيا بڭا مسلّط اولوب بڭا عذاب ويرديگنه قطعى قناعت گتيرمشم. بو دردنجى نمونهنڭ ايضاحنى أڭ صوڭ يازيلان مكتوبلردن، أهلِ سياست، سعيدى دينى سياسته آلَت ياپار دييه حپسلره آتمهسى و صوڭره سعيد اونڭ حكمتنى يعنى قدرڭ شفقت طوقاتلرى اولديغنى آڭلاماسيله اونلرى حلال ايتمهسى و كندى تحمّلنڭ حكمتنى آڭلاماسنه دائر اولان او مكتوبه حواله ايدييورز.
بشنجى نمونه: بو بيچاره سعيدڭ غايت محتاج اولديغى و يتمش سنهدن بَرى او صنعتله مشغول اولماسى و بعض گون ايكى يوز صحيفه قدر تصحيحه مجبور اولماسيله برابر اون ياشندهكى ذكى بر چوجغڭ اون گونده موفّق اولديغى يازى قدر بر يازىيه مالك اولامديغنه حيرت ايديلييوردى. حالبوكه سعيد بتون بتون إستعدادسز دگلدر. هم ده نسبى قارداشلرينڭ هپسنڭ ده گوزل يازيلرى اولديغى حالده، بو قدر يازىيه محتاج ايكن بويله ياريم اُمّى وضعيتڭ حكمتى، قناعتِ قطعيهمله شودر كه: بر زمان گلهجك كه، جزئى و شخصى إقتدارلر و قوّتلر مقابله ايدهميهجك دهشتلى معنوى دشمنلرڭ هجومى زماننده گوزل يازى صاحبلرينى روح و جانيله آرامق و خدمتنه شريك ايتمك و او چكردگڭ أطرافنده صو، هوا، نور گبى او معنوى آغاجه خدمت ايتمك ايچون او شخصى و جزئى خدمتى، كلّى و عمومى و قوّتلى و بر قلمه مقابل بيڭلر قلمى بولمق حكمتيله و بوز پارچهسى گبى بنلگنى او مبارك حوض ايچنده أريتمهسيله حقيقى إخلاصى ألده ايتمك و بو صورتله ايمانه خدمت ايتمك حكمتى ايله اولمش.
اَلْبَاقِى هُوَ الْبَاقِى
قارداشڭز
سعيد النورسى
❊ ❊ ❊
(مدينۀِ منوّرهده بولونان و نورڭ حقيقتنى تام آڭلايان و إسلاميته خدمت ايدن بر ذاتڭ مكتوبيدر)
گوڭللر فاتحى پك محترم و مكرّم استاديمز حضرتلرى!
مبارك أللريڭزدن اوپر، بتون عزيز و صداقتلى طلبهلريڭزله برابر صحّت و سلامتده دائم اولماڭزى بارگاهِ كبريادن نياز أيلرم.
مسلمانلر ايچون أڭ بيوك بر بايرام دييه آنجق وصفلاندريلابيلن برائتڭز، بتون نورجيلرى شاد و خندان أيلديگى گبى، بندهڭزى ده دنيالر قدر ممنون و مسرور أيلهمشدر. ناصل ممنون ايتمهسين كه، سزڭ أثرلريڭزله برلكده برائتڭز ديمك؛ روحڭ مادّياته، نورڭ ظلمته، ايمانڭ كفره، حقّڭ باطله، توحيدڭ شركه و عرفانڭ جهله غالب گلمهسى ديمكدر.
ييللردن بَرى اوڭنه صيرهطاغلر گبى أنگللر، قورقونج اوچوروملر گبى مانعلر قونيلان نور چاغلايانى؛ أڭ صوڭنده معجزهوى بر شكلده بتون سدلرى ييقمش، مانعلرى آشمش، نور ايله بتون ظلمتلرى تارمار أيلهمشدر.
«معجزهوى خارقهلرله طوغان إلٰهى تجلّيلرڭ وصفنده قلملر قيريلير، فكرلر گوريلدر، إلهاملر يانار كول اولور.» ديرلردى. حقيقةً بندهڭز، شيمدى بو مستثنا ظفرڭ قارشيسنده عين عجزى بتون وارلغمله حسّ ايدييورم. زيرا تفكّر و إلهاممه نهايتسز بر اُفق آچيلييور... جهان، محتشم بر نور معبدينى آڭديرييور... جوارمدهكى هر شى، هر ير درين وجد و إستغراقلرله غشى اولمش بر حالده... هر ذرّهده (وَاِنْ مِنْ شَىْءٍ اِلَّا يُسَبِّحُ بِحَمْدِهٖ) سرِّ سبحانيسى تجلّى ايدييور...
بناءً عليه بيلمييورم، بو مسعود حادثه يى؛ شانلى بر ظفر، شاهانه بر فتح، إلٰهى بر قورتولوش، جهانشمول بر بايرام دييه مى وصفلانديره يم؟ زيرا قدسى دعوانڭ قزانمش اولديغى بو إلٰهى ظفر، بتون إسلام و إنسانلق دنياسندهكى مجاهدلرڭ عزملرينه قوّت، روحلرينه جان، ايمانلرينه خيز و هيجان ويرمشدر.
أوت عزم و ايمانلرى، عشق و أمللرى هنوز كماله ايرمهمش اولان بر چوق مسلمانلر؛ مع الأسف آجيقلى بر يأس ايچنده ايديلر. بويله بر ظفرڭ تحقّقنى، خيال و محال گورويورلردى. فقط بتون فيض و نورينى إنسانلغى تنوير و إرشاد ايچون إلٰهى بر گونش حالنده عرشِ أعظمڭ پرنور اُفقلرندن اينن قرآنِ كريمدن آلان نور نشرياتى، طورغون گوللرى آڭديران گوڭللرى دريالر گبى جوشديرمش، قسوت و هجران ييللرينڭ اُميد و أمللره وورديغى مدهش زنجيرلرى قيرمشدر. او نور قايناغندن فيشقيران او سراپا فيض و حكمتلر صاچان أثرلر؛ حسلرڭ، فكرلرڭ و بِالخاصّه آلَوْلر ايچنده يانان روح و وجدانلرڭ أزلى و أبدى إحتياجلرينه جواب ويرديگى گبى؛ اونلرى طالغه طالغه بوغوجى قراڭلقلر محيطندن، ترتميز و پيريل پيريل نور اُفقلرينه چيقارمشدر.
ييللرجه دوام ايدن اوزون بر سكوت، درين بر غفلت و بوغوجى بر ظلمتدن صوڭره إلٰهى بر گونش حالنده پارلايان بو قدسى ظفر، نور ايچون يول آرامقده اولان پريشان بشريتڭ ياقين بر گلهجكده اويانهجغنى مژدهلهمكدهدر. چونكه دين إحتياجى؛ صِرف مسلمانلرڭ دگل، بِالعموم إنسانلرڭ أزلى و أبدى إحتياجيدر.
بوگون بدبخت إنسانلق، دين نعمتندن محروم اولمانڭ سوركلى هجران و فلاكتلرينى باغرى يانهرق چكمكدهدر. بو آجيقلى بحرانڭ قورقونج نتيجهسيدر كه، چاريك عصر ظرفنده ايكى بيوك حربه گيرمش و اوچنجيسنڭ ده قپوسنى چالمق چيلغينلغنى گوسترمكدهدر.
آرتيق بتون إنسانلرى قارداش ياپارق يم يشيل جنّتلرڭ نورلى اُفقلرندن أسن رفاه و سعادت، حضور و آسايش روزگاريله طالغهلانان عالمشمول بر بايراق آلتنده طوپلايهجق اولان يگانه قوّت، إسلامدر. زيرا بشريتڭ بوگونكى حالى، طبقى إسلامدن أوّلكى إنسان جمعيتلرينڭ آجيقلى حاليدر. بونڭ ايچون إنسانلغى او گونكى أبدى فلاكتدن قورتاران إسلام، بوگون ده قورتارهبيلير...
أوت ميليونلرڭ، ميليارلرڭ قلبنده عصرلردن بَرى قانامقده اولان او درين ياره يى صاراجق يگانه مشفق أل؛ إسلامدر. هر نه قدر اُفقلرده زمان زمان بعض اويدورما ايشيقلر گوروليورسه ده.. مستقبل، بتون نور و فيضنى گونشلردن دگل، بِالذّات ربّ العالميندن آلان أزلى و أبدى «ييلديز»ندر. او ييلديز، دنيالر طوردقجه طوراجق و اونى سوندورمك ايسته ينلرى يردن يره وورهجقدر.
جهانقيمت استادم!
معلومِ فاضلانهلريدر كه؛ صوڭ گونلرده مقدّس دعوايه خدمت ايدن بعض تنوير و إرشاد حركتلرى طوغمش، فقط مع الأسف هيچ بريسى رسالۀِ نور كلّياتنڭ گورديگى مهمّ ايشى گورهمهمش و إحراز ايتديگى إلٰهى ظفرى قزانامامشدر. زيرا بو يول؛ پيغمبرلرڭ، وليلرڭ، عارفلرڭ، صالحلرڭ و بِالخاصّه جاننى جانانه سَوه سَوه فدا ايدن و صاييسى ميليونلره صيغميان قهرمان شهيدلرڭ مقدّس يوليدر. آرتيق بو چتين يولده يورومك ايسته ينلر، هر آن قارشيلرينه ديكيلهجك اولان مدهش مانعهلرى دائما گوز اوڭنده طوتمالرى لازمدر. أوت بو يولده يورويهجك اولانلرڭ؛ سزدهكى صارصيلمق بيلمه ين ايمانله، يوكسك و إلٰهى عرفانله و بِالخاصّه خارق العاده إخلاص و فراغتله مجهّز اولمالرى گركدر. چونكه بو مهمّ واديده نور دعواسنڭ تعقيب ايتديگى تبليغ، تنوير و إرشاد اصولى، بامباشقه خصوصيتلر طاشيمقدهدر. آرتيق إنسانڭ حسّ و فكرينه، روح و وجداننه بامباشقه اُفقلر آچاجق اولان بو درين بحثى، دعا بيورڭ ده مستقل و مفصّل بر أثرده عزيز دين و گوڭلداشلريمزه عرض ايتمك شرفنه نائل اولايم. چونكه بو نورلى بحث او قدر درين و او درجه مهمدر كه، بويله بر قاچ صحيفهلك مكتوب و مقالهلرله أصلا إفاده ايديلهمز.
ايمان و قرآن نورى ايله ترتميز گوڭلنى فتح ايتديگڭز گنجلك، إلٰهى ظفريڭزڭ أڭ پارلاق دليلنى تشكيل ايدن أڭ مهمّ وارلق و أڭ قيمتلى جوهردر... «نوردن سسلر»ڭ همان هر مصراعنده، أصيل و شعورلى روحنه خطاب ايتديگم ترتميز گنجلك، ايشته بو حق و حقيقتڭ باغرى يانيق عاشغى اولان گنجلكدر.
نورلى دعوانڭ قزانمش اولديغى بو صوڭ ظفرڭ ويرديگى بتون وجدله طولو بر إلهامله يازديغم شو منظومه يى تقديم ايدييورم. قبولنى رجا و إسترحام أيلرم.
تكرار تكرار أللريڭزدن اوپر، قيمتلى دعالريڭزى بكلهرم، پك محترم استادم حضرتلرى.
معنوى أولادلريڭزدن
على علوى
❊ ❊ ❊