جوانبنى سويلتديرمكله قلبلرڭ أڭ اوزاق كوشهلرندهكى إستحسانى و آلقيشلامايى تهييج ايتمگه بيوك بر أساسدر. أوت تلميح و إشارت ايسه، يولڭ أطرافنى تماشا ايله تنزّه ايتمك ايچوندر. قصد و طلب و تصرّف ايچون دگلدر. ديمك متكلّم اونده مسئول اولماز. أگر ايسترسهڭ بو بيتلرڭ ايچلرينه گير. بر درجه سيره شايان نقطهلر واردر:
ايشته چال اولان آتنه بينمش، نازنين قارشيسنده گنجلنمك ايستهين إختيار بابانڭ صقالنڭ ايچنه باق، بلاغتڭ چوق آناختارلرينى بولاجقسڭ. آل قپولرى آچ، ايشته:
(قَالَتْ كَبِرْتَ وَ شِبْتَ قُلْتُ لَهَا ۞ هٰذَا غُبَارُ وَقَايِعِ الدَّهْرِ) يعنى: ديدى: «إختيار اولدڭ.» ديدم: «دگلدر؛ بلكه مصائبِ دهرڭ گورولتيسندن آياقلرى آلتنده چيقوب صقالمه قونمش بر بياض غباردر.»