أگر بويله سرخوشلرڭ سوزلرندن خوشلانمييورسهڭ، صويڭ مهندسى اولان هُدْهُدِ سليمانڭ سبأدن گتيرديگى نبأ و خبرى ديڭله!.. ناصل إنزالِ قرآن و إبداعِ سماوات و أرض ايدن ذو الجلالڭ توصيفنى ايتمشدر. هُدْهُد دييور: «بر قَومه راست گلدم. زمين و آسماندن مخفياتى چيقاران اللّٰهه سجده ايتمييورلر...» باق أوصافِ كماليه ايچنده، هدهدڭ هندسهسنه تلويح ايدن وصفِ مزبورى يالڭز إختيار أيلدى.
إشارت: اسلوبدن مرادم كلامڭ قالبيدر و صورتيدر. باشقهلر باشقه دييورلر. و بلاغتجه فائدهسى، قصّتڭ تفاريقنى و پريشان اولان پارچهلرينى إلتحام و بيتيشتيرمكدر. تا قاعدۀِ «بر شى ثابت اولورسه لوازميله ثابتدر» سرّيله، بر جزئى تحريك ايتمكله قصّتڭ كلّنى إهتزازه گتيرمكدر. گويا متكلّم، اُسلوبڭ بر كوشهسنى مخاطبه گوسترسه، مخاطب كندى كندينه وَلَوْ بر درجه قراڭلق اولسه ده، تمامنى گورهبيلير.