إطلاقدر. تا، أذهان مشوّش اولماسينلر. فقط حقيقته تلويح و رمز و ايما ايتمك گركدر. أفكار ايچون قپولرى آچمق، دخوله دعوت ايتمك لازمدر. ناصلكه شريعتِ غرّاء اويله ياپمشدر.
ياهو.. أى برادر! إنصاف ميدر، تحرّئِ حقيقت بويله ميدر كه: سن إرشادِ محض و عينِ بلاغت و هدايتڭ مغزى اولان شيئى، إرشاده منافى و مباين توهّم ايدهسڭ؟ و بلاغتجه عينِ كمال اولان شيئى، نقصان تخيّل ايدهسڭ؟ يا أيّها الحوتو! عجبا سنڭ ذهنِ سقيمڭده بلاغت او ميدر كه، أذهانى تغليط و أفكارى تشويش و محيطڭ مساعدهسزلگى و زمانڭ عدمِ إعدادندن أذهان مستعد اولمادقلرى ايچون عقوله تحميل ايديلمهين شيلرى تكليف ايتمكدر؟ كلاّ. (كَلِّمِ النَّاسَ عَلٰى قَدَرِ عُقُولِهِمْ) بر دستورِ حكمتدر. ايسترسهڭ مقدّماته مراجعت ايت... باخصوص برنجى مقدّمهده ايى تفكّر ايت!..