اوچنجى مسلك
يعنى: زمانِ حالڭ، يعنى عصرِ سعادتڭ صحيفهسنده درت نكته، بر نقطه يى نظرِ دقّته آلمق گركدر:
برنجيسى: كوچك بر عادت، كوچك بر قَومده ويا ضعيف بر خصلت، قليل بر طائفهده؛ بيوك بر حاكمڭ، بيوك بر همّتله قولايلقله قالديرامديغنى نظره آليرسهڭ؛ عجبا غايت چوق، تمامًا مستمرّه، نهايت درجهده مألوف و چوق ده متنوّعه، تمامًا راسخه اولان عادات و أخلاق، نهايت كثير و مألوفاتنه غايت متعصّب و شديد الشكيمه اولان بر قَومڭ أعماقِ أرواحندن آز فداكارلقله، قيصه بر زمانده قلع و رفع ايتديگنى و او عاداتِ سيّئهنڭ يرينه باشقه عادات و أخلاق فدانلرينى غرس ايتمهسى و دفعةً نهايت درجهده تكمّل ايتدكلرينى نظره آليرسهڭ و دقّت ايدرسهڭ، خارق العاده اولديغنى تصديق ايتمزسهڭ؛ سنى سوفسطائى دفترنده يازاجغم.