حركاتنڭ إمتزاجندن جدّيت و حقّيت شعلۀِ جوّاله گبى و إنعكاساتندن و موازناتندن صدق و إصابت، برقِ لامع گبى تظاهر و تجلّى ايدييور.
إشارت: زمانِ ماضى و زمانِ حال، يعنى عصرِ سعادت و زمانِ إستقبال تضمّن ايتدكلرى براهينِ نبوّت لسانِ واحد ايله معدنِ أخلاقِ عاليه اولان ذاتِ محمّدده (عليه الصلاة والسلام) داعىِ صدقى و دلاّلِ نبوّتى اولان برهانِ ذاتينڭ نداسنه جواب و هَمْدستِ وفاق اولارق نبوّتنى إعلا و إعلان ايتدكلرينى كور اولميانلره گوسترديلر. شو حالده كتابِ عالمدن اولان فصلِ زمانڭ صحيفۀِ ثلاثهسنى مطالعه ايدهجگز. هم ده او كتابدن مسئلۀِ عظما و منوّره اولان ذاتِ محمّدى (عصم) تماشا و زيارت ايدهجگز. مدّعامز اولان برهانڭ كبراسنى اونڭ ايله إثبات ايدهجگز.
ايشته بو نقطهيه بناءً مسالكِ نبوّت درتدر. بشنجيسى مشهور و مسطوردر.