إشارت: بر آدمه ميليونلرجه سنه عمر ايله بتون لذائذِ دنيويه و هر جهتدن تسلّطِ تام ويريلديگى حالده.. إستعدادندهكى لايتناهيلگڭ حكمنجه بر «آخ.. آه.. لَيْتَ» يى چكهجكدر. گويا او عدمِ رضا ايله رمز و إشارت ايدييور كه: إنسان أبده نامزددر و سعادتِ أبديه ايچون خلق اولونمشدر. تا غيرِ متناهى بر زمانده، غيرِ محدود و گنيش بر عالمده، غيرِ محصور اولان إستعداداتنى بِالفعله چيقارهبيلسين.
تنبيه: عدمِ عبثيت و حقائقِ أشيانڭ ثبوتيتلرى ايماء ايدييور كه: بو طار و محصور و هر بر لذّتنده چوق أعراضڭ مزاحمتيله كشماكش و تحاسددن خالى اولميان شو دنياىِ دنيّه ايچنده كمالاتِ إنسانيه يرلشمز. بلكه گنيش و مزاحمتسز بر عالم لازمدر. تا إنسان حقّيله سنبللنسين و أحوال و كمالاتنه نظام ويرمكله، نظامِ عالمه هَمْدستِ وفاق اولابيلسين.