قلب ديدكلرى لطيفۀِ ربّانيهنڭ پاصى و زنگارى حكمنده اولان آرزوىِ خلاف و إلتزامِ طرفِ مخالف و معذور طوتولمق ايچون كندى أوهامنه بر حق ويرمك و بر أصله إرجاع ايتمك و مجموعڭ نتيجهسنى هر بر فرددن ايستهمك كه، ضعفيتى سببيله نتيجهنڭ ردّينه بر إستعدادِ سيّئه ويريلير (١). هم ده بهانهلى چوجقلق طبيعتى، هم ده مهانهلى دشمن سجيهسى، هم ده يالڭز عيبى گورمك شاننده اولان مشترى نظرى گبى أمرلردن او مرآتى تصقيل و تصفيه ايت، موازنه و مقابله أيله. أكثر أماراتڭ إمتزاجندن تظاهر ايدن حقيقتڭ شعلۀِ جوّالهسنى قرينۀِ منوّره ايت؛ تا أقلدهكى أوهامِ مظلمه يى تنوير و دفع ايدهبيلهسڭ... هم ده منصِفانه و مدقّقانه ايله ديڭله، كلام تمام اولمادن إعتراض ايتمه. نهايته قدر بر جملهدر، بر حكمدر. تمام اولدقدن صوڭره بر وهمڭ قاليرسه سويله...
___
(١): دقّت لازمدر.