آيتنڭ صدفنده مكنون اولان برهان التمانع، بو منهاجه بر منارِ نيّردر. أوت إستقلال، الوهيتڭ خاصّۀِ ذاتيهسيدر و لازمۀِ ضروريهسيدر.
تنوير: كائناتدهكى تشابهِ آثار و أطرافى بربريله معانقه و أل أله طوتمش بربرينه عرضِ إنتظام و بربرينڭ سؤالنه قارشى جوابِ صواب و بربرينڭ نداىِ إحتياجنه لبّيك جوابى ويرمك و بر نقطۀِ واحدهيه تماشا ايتمك و بر محورِ نظام اوزرنده دوران ايتمك جهتيله صانعڭ توحيدينه تلويح، بلكه حاكمِ أزلڭ وحدانيتنه تصريح ايدييور. أوت، بر ماكينهنڭ صانعى و مخترعى بر اولور.
﴿وَفٖى كُلِّ شَىْءٍ لَهُ اٰيَةٌ تَدُلُّ عَلٰى اَنَّهُ وَاحِدٌ﴾
كتابِ عالمڭ أوراقيدر أبعادِ نامحدود
سطورِ كائناتِ دهردر أعصارِ نامعدود
باصيلمش دستگاهِ لوحِ محفوظِ حقيقتده
مجسّم لفظِ معنيداردر عالمده هر موجود.