خلق ايدن خالقِ ذو الجلاله قَسَم ايدرم كه: دنياده شو ايكى مسلگڭ تماسنى إنتاج ايدن رأىِ أحمقانهدن داها قبيح و داها خسيس و داها صاحبنڭ مزاجِ عقلنڭ إنحرافنه دليل اولاجق بر رأى يوقدر.
تنوير: كُرۀِ أرض كوچك، پارچه پارچه و رنگارنك و متخالف جام پارچهلرندن فرض اولونورسه، هر برى باشقه چشيدله لَوْننه و جِرمنه و شكلنه نسبتله شمسدن بر فيض آلاجقدر. شو خيالى فيض ايسه، نه گونشڭ ذاتى و نه عينِ ضياسيدر. هم ده ضيانڭ تماثيلى و ألوانِ سبعهسنڭ تصاويرى و گونشڭ تجلّيسى اولان شو گوناگون و رنگارنك چيچكلرڭ ألوانى فرضا لسانه گليرسه، هر برى «گونش بنم گبيدر» وياخود «گونش بنم» دييهجكلردر.
﴿اٰنْ خَيَالَاتٖى كِه دَامِ اَوْلِيَاسْت ۞
عَكْسِ مَهْرُويَانِ بُوسْتَانِ خُدَاسْت﴾