تماشا ايدييور. حالبوكه تكوينِ عالمده بر قسمنى مادّهسز إبداع و بر قسمى دخى مادّهدن إنشاء ايله شو قدر حيرتفزا آثارِ معجزه ايله قدرتِ كاملۀِ إلٰهيه يى گوسترمكله برابر اوندن صرفِ نظر ايتمك، غائبى شاهد صورتنده گورمك اولان قياسِ خادع ايله و أبناءِ جنسنى محاكمه ايتديگى گبى (بر قاعدۀِ محدوده ايله) واجب الوجوده نظر ايدرلر. حتّى چوق مسئله يى عقلِ سليم معقول گورديگى حالده، اونلر غيرِ معقول توهّم ايدرلر.
تنبيه: مخترعاتدن قطعِ نظر؛ مصنوعاتڭ أڭ ظاهر و منوّر و «ضياء» ديدكلرى اولان نورِ عينِ عالمڭ قوانينِ عجيبهسى و اونڭ ثمرهسى و مثالِ مصغّرى اولان نورِ بصرڭ نواميسِ بديعهسيله منوّر و مصوّر اولان كمالِ قدرتِ إلٰهيهنڭ جانبنده موازنه نقطۀِ نظرنده غيرِ معقول و اوزاق توهّم اولونان مسائله تماشا ايديليرسه، مأنوس و عينِ عقلڭ كيرپيكلرى اورتهسنده گورولهجكدر.