أبناىِ جنسنده آرايهجقدر. حتّى هيچ بر جهتدن ممكناته بڭزهمهين واجب الوجودى تفكّر ايتسه؛ ينه قوّۀِ واهمهسى شو وهمِ سيّئى دستور و دوربين ياپمق ايسته يور. حالبوكه صانعِ ذو الجلال، شو نقطۀِ نظرده تماشا ايديلمز. قدرتنه إنحصار يوقدر. ضياءِ شمس گبى، قدرت و علم و إرادهسى شامله و عامّهدر، منحصر اولماز، موازنهيه گلمز. أڭ بيوك شيئه تعلّق ايتديگى گبى، أڭ كوچك و أڭ خسيس شيئه دخى تعلّق ايدر. مقياسِ عظمتى و ميزانِ كمالى، مجموعِ آثاريدر. هر بر جزئى مقياس اولاماز. ايشته واجب الوجودى ممكناته قياس ايتمك، قياسِ مع الفارقدر. مزبور وهمِ باطل ايله محاكمه ايتمك خطاءِ محضدر.
ايشته شو خطاءِ بىأدبانه و شو وهمِ باطلڭ نتيجۀِ سيّئهسيدر كه: طبيعيّون، أسبابى مؤثّرِ حقيقى اولدقلرينه؛ و معتزله، حيوانلرى أفعالِ إختياريهلرينه خالق اولدقلرينه؛ و حكماء، جزئياتده علمِ إلٰهينڭ نفينه؛ و مجوسيلر، خلقِ شرّ باشقهسنڭ أثرى اولديغنه إعتقاد