سنڭ منصف اولان ذهنڭه معلومدر كه: كرويتِ أرض و يرڭ يووارلقلغنه؛ محقّقينِ إسلام (أگرچه إتّفاقِ سكوتيله اولسه) إتّفاق ايتمشلردر. أگر بر شبههڭ وارسه «مقاصد» و «مواقف»ه گيت؛ مقصده وقوف و إطّلاع پيدا ايدهجكسڭ و گورهجكسڭ: سعد و سيّد، طوپ گبى كره يى أللرنده طوتمشلر، هر طرفنه تماشا ايدييورلر.
أگر او قپو سڭا آچيلامدى؛ «مفاتيح الغيب» اولان إمامِ رازينڭ گنيش اولان تفسيرينه گير و سريرِ تدريسده او داهى إمامڭ حلقۀِ درسنده اوطور، درسنى ديڭله.
أگر اونڭ ايله مطمئن اولامدڭ؛ أرضى، كرويت قابنه صيغيشديرهمدڭ؛ إبراهيم حقّينڭ آرقهسنه دوش، حجّة الإسلام اولان إمامِ غزالينڭ ياننه گيت، فتوا ايسته... دى كه: «كرويتده مشاحّت وار ميدر؟» ألبته