يرلشهمييور. صوڭره بر نظرِ حق گلير، اونى تجريد ايتمكله چيپلاق ايدهرك توابعنى طاغيتوب أصلنه إرجاع ايدر. «حق گلير، باطل ئولور» سرّى ده ظاهر اولور.
أزجمله: بو گونلرده بر حكايه بوڭا مثال اولابيلير: فخر اولماسين؛ زمانِ صباوتمدن بَرى اسّ الأساسِ مسلگم؛ إفراط و تفريط ايله حقائقِ إسلاميته سورولن لكهلرى تميزلهمك و او ألماس گبى حقيقتلرينه صيقل وورمق ايدى. بو مسلگمه تاريخِ حياتم، پك چوق وقوعاتيله شهادت ايدر. بونڭله برابر، بوگونلرده كرويتِ أرض گبى بديهى بر مسئله يى ذكر ايتدم. او مسئلهيه تماس ايدن مسائلِ دينيه يى تطبيق و توفيق ايدهرك دشمنلرڭ إعتراضاتنى و محبِّ دينڭ وسوسهلرينى دفع أيلدم. ناصلكه مسائلده مفصّلًا گلهجكدر. صوڭره غول يبانى گبى، خيالاته آليشان ظاهرپرستلرڭ دماغلرى قبول ايتميهجك گبى گورونديلر. فقط أصل سبب باشقه غرض اولمق گركدر. گويا گوز يوممقله گوندوزى گيجه