ايدرم: نوعِ بشر، شر و قبح و باطلى، زحمتسز يعنى (بِسلامة الأمر) ايله هضم ايدهميهجكدر. هم ده حكمتِ إلٰهيه مساعده ايتميهجكدر.
أوت حقوقِ عموميۀِ كائناته جنايت ايدن عفو اولونماز، راهِ عدم ويريلمز. أوت بيڭلر سنه شرّڭ غلبهسى يالڭز بو دنياده أڭ أقلّ بيڭ سنه مغلوبيتِ مطلقه ايله نتيجه ويرهجكدر. عالمِ اُخرٰىده خير، شرّى إعدامِ أبدى ايله محكوم ايدهجكدر. يوقسه عالمڭ منتظمه و مكمّله و أوامرِ إلٰهيهيه مطيعه اولان سائر أنواع و أجناس؛ بو پريشان و شقاوتجى اولان نوعِ بشرى كنديلرى ايچنده قبول ايتميهرك، حقوقِ وجوددن إسقاط و ظلمتخانۀِ عدمه نفى و وظيفۀِ خلقتدن طرد ايتمك، إقتضا و عرضِ حال ايدهجكلردر. بو ايسه بتون إستعداداتِ بشريه يى و عالمده سلطنت سورمك و آخرتده سعادتِ أبديهيه مظهر اولمق ايچون مجهّز ايديلن قابلياتى و ميولاتى عبث و بيهوده اولمقلغى إستلزام ايدر. عبث ايسه إستقراءِ تامّه