يدنجى مقدّمه
مبالغه إختلالجيدر. شويله كه: بشرڭ سجيهلرندندر، تلذّذ ايتديگى شيده مَيل التزيّد و وصف ايتديگى شيده مَيل المجازفه و حكايه ايتديگى شيده مَيل المبالغه ايله، خيالى حقيقته قاريشديرمقدر. بو سجيۀِ سيّئه ايله اييلك ايتمك، فنالق ايتمك ديمكدر. بيلمديگى حالده تزييدندن نقصان، إصلاحندن فساد، مدحندن ذمّ، تحسينندن قبح تولّد ايدر. زيرا موازنت و تناسبدن ناشى اولان حسنى، (مِنْ حَيْثُ لاَ يَشْعُرُ) إخلال ايدر. ناصلكه بر علاجى إستحسان ايدوب إزدياد ايتمك، دوايى دائه إنقلاب ايتمكدر. اويله ده هيچ بر وقت حق اوڭا محتاج اولميان مبالغهلى ترغيب و ترهيب ايله، غيبتى قتله مساوى ويا آياقده بول ايتمك زنا درجهسنده گوسترمك ويا بر درهمى تصدّق ايتمك حجّه مقابل طوتمق گبى موازنهسز سوزلر؛ قتل و زنايى تخفيف و حجّڭ قيمتنى تنزيل ايدييورلر. بو سرّه بناءً: واعظ هم